Vielha demana a la Diputació més suport per les EMD

Er alcalde de Vielha e Mijaran Pau Perdices, sollicitèc eth passat dia 17 de junh ath President dera Deputacion de Lleida, Jaume Gilabert, melhorar er assessorament tecnic e juridic des Entitats Municipaus Descentralizades (EMD) de Vielha e Mijaran

Gilabert, de visita eth dia 17 de junh en cap-lòc d’Aran damb moti dera Hèsta d’Aran, s’amassèc damb era corporacion entà debater ahèrs d’interès tath municipi. Perdices li manifestèc a Gilabert era mancança qu’an es EEMMDD en çò que tanh a assessorament tecnic e juridic tot e èster ua competéncia aquerida peth Conselh Generau d’Aran mejançant un convèni signat damb era Diputació de Lleida. Segontes Perdices er Ajuntament de Vielha e Mijaran a de hèr front a sèt Entitats Municipaus Descentralizades e non dispause de recorsi umans n’economics entà hè’c. “Es pedanies, tot e non auer massa competéncies, a nivèu de foncionament an es madeishes obligacions qu’un ajuntament o ua administracion locau e aguest hèt requerís ua complexitat administratiua quer Ajuntament de Vielha e Mijaran dificilament pòt assumir”, remerquèc Perdices. En aguest sentit Gilabert manifestèc que revisarà eth convèni signat damb eth Conselh Generau. Tanhent as infraestructures, Gilabert se comprometec a finalizar abantes dera fin d’enguan es òbres de melhora dera carretèra d’accés a Vilac, començades en mes de març e que supausen ua inversion d’un milion d’èuros. Er alcalde de Vielha e Mijaran demanèc ath President dera Diputacion era possibilitat de soterrar quauqui servicis coma era telefonia o ere lum profitant es òbres dera carretèra, atau coma auer en compde ar ajuntament ena contractacion des servicis entara neteja des accesi as nuclèus. Perdicers tanben reclamèc a Gilabert era collaboracion dera Diputació ena reforma estructurau deth pònt d’Aubèrt sus er arriu Garona. Fin finau, Gilabert anoncièc qu’a demanat ua entrevista damb eth Ministèri de Foment entàra melhora dera N-230 sustot en tram entre era Boca Sud e Vielha ja qu’entén qu’ei un eish vertebrador dera provincia. D’auti compromisi qu’eth Presiden dera Diputació assumic siguéren auançar en projècte dera trauèssa de Vielha e en melhorar era C-28 entre Salardú e eth Cap deth Pòrt.