Eth nau jutjat de Vielha poderà daurir es sues pòrtes a començaments der an 2010

Vielha.-En tot complir es previsions iniciaus, des de hè uns dies s’an començat es òbres d’acondicionament deth nau jutjat de prumèra instancia de Vielha que se plaçarà ena recenta inaugurada plaça Mossen Joan Caseny de Vielha. Mentres duren es òbres se mantien operatiues es antigues dependéncies judiciaus atau coma er espaci abilitat, des deth pasat mes d’agost tath registre civil , e qu’ei proprietat der ajuntament de Vielha e Mijaran.
Eth nau jutjat dispausarà de 543 m2 repartidi en cinc plantes en un lòc centric deth municipi. Era amplitud des espacis melhorarà substanciaument era atencion as ciuatadans, segontes a declarat er alcalde de Vielha e Mijaran, Pau Perdices. Era inverison dera òbra entà abilitar tot eth nau jutjat ei de 167.500 euros.

Era auta bastissa, a diferéncia dera anteriora, suprimirà es barrèrs arquitectoniques e s’adapte ara naua normatiua contra huecs. Ena planta soterranha se i plaçarà era sala de demora, era de procuradors e era d’abocats, er archiu deth burèu judiciau atau coma era zòna de detengudi. Ena planta baisha se i plaçarà eth registre civiu, ua sala de demora e ua sala multiusi, entre d’auti. Es autes plantes se destinaràn a burèus entàs trabalhadors.
Segontes es tecnics responsables dera òbra se prevé qu’eth pròplèu mes de noveme sigue dejà prèsta, de manèra qu’era dubertura des naues dependéncies judiciaus poderie hèr-se efectiua a inicis de 2010.
Er alcalde de Vielha e Mijaran, Pau Perdices, ei fòrça satisfèt damb er auanç des òbres e damb era melhora deth servici ara ciutadania qu’aguest hèt represente.