Er ajuntament de Vielha e Mijaran vò arténher depurar ath 100% es aigües residuaus de toti es nuclèus deth municipi en mens d’un an

Vielha.- Er alcalde de Vielha e Mijaran, Pau Perdices, s’amassèc a començaments d’aguesta semana damb es representats der ACA en Lleida entà auançar es besonhs deth municipi en çò que tanh ath tractament des aigües residuaus. Actuaument , en tèrme municipau de Vielha e Mijaran, es nuclèus d’Aubèrt, Mont, Vila e Betlan contunhen sense depurar es sues aigües residuaus que s'ab`quen dirèctament en Garona.

Pròplèument ei previst eth començament des òbres dera depuradora d’Aubèrt, qu’en un principi sonque tractarà es aigües d’aguesta vila. Autant er Ajuntament de Vielha e Mijaran coma era EMD d’Aubèrt an demanat ar ACA era possibilitat qu’era installacion tanben tracte es aigües de Vila, Betlan e Montcorbau.

S’açò siguesse possible e segons es previsions der alcalde deth municipi, Pau Perdices, en mens d’un an se poderie arténher eth 100% des aigües lordes tractades e depurades deth municipi. Perdices cree que serie una bona carta de presentacion entà un municipi coma eth de Vielha e Mijaran, que a ena actiuetat toristicas era principau actiuetat economica e qu’era preservacion e er estat de conservacion des sues aigües constituïsque un des atractius principaus.

Naua deporadora en Arròs

D’aute biais, aguesta semana s’an iniciat es òbres entà canalizar e depurar es aigües residuaus deth nuclèu d’Arròs. Era naua depuradora ei plaçada a pògui mètres der arriu Garona e ua finca de proprietat dera EMD d’Arròs, apròp dera base des Servicis Ambientaus dera Val d’Aran.

Er Alcalde de Vielha, Pau Perdices, s’amassèc damb representants dera empresa d’enginharia que se n’encuede dera òbra e damb era presidenta dera EMD d’Arròs e Vila, Lourdes Santacruz, entà hèr un seguiment des actuacions e evitar ath maxim possible es talhs ena via publica. Cau auer en compde qu’er acondicionament d’un tram dera òbra serà en crotze ara nautada de Pònt d’Arròs damb er accés ath Saut deth Pish, Vilamòs e Arròs, un des mès transitadi en tempsada d’ostiu.

Er Ajuntament tanben trabalhe entà arténher qu’era ACA autorize eth bastiment de naui collectors en Vila, Aubèrt, Mont e Montcorbau.


Incidéncia en Vilac

Es riades deth mes de mai an deishat ath nuclèu de Vilac sense collector d’aigües residuaus hèt que provòque que s'abòquen dirèctament en arriu Salient, un afluent deth Garona.

Er Ajuntament de Vielha e eth President dera EMD, José Rella, dejà an metut en coneishement dera Agéncia Catalana der Aigua, qui s’a comprometut a actuar-i inmediatament.


Nau colllector en Mont

Era Agencia Catalana der Aigua a autorizat era connexion deth collector d’aigües lordes de Mont ar hilat que condusís entara estacion depuradora municipau plaçada en Bèussa, ena que seràc tractades e depurades, entà èster retornades tar arriu Garona.

Entar alcalde de Vielha e Mijaran, Pau Perdices, ei ua molt bona actuacion que compòrte era contunhitat der objectiu de depurar integrament es aigües de toti es nuclèus de poblacion deth municipi. Rebrembrèc qu’era depuradora de Bèussa tractarè es aigües residuaus de Betre, Vielha, Casau, Gausac, Vilac e Mont.