Er alcalde de Vilac demane precaucion pera perilhositat dera via d’accés ath pòble, en òbres

Vilac.- Er alcalde pedani de Vilac, Jose Rella, a demanat precaucion as visitants qu’aguesta dimenjada vagen entà Vilac damb motiu dera Hèsta Major. Eth retardiment enes òbre de melhora dera carretèra LV-5052 que da accés ath pòble des dera N-230, de titolaritat dera Diputació de Lleida, dificulten era circulacion pera via e supausen un risc entara circulacion nocturna.
Aguest meddia, er alcalde de Vilac, Jose Rella, acompanhat deth tinent d’alcalde de Vielha e Mijaran, Alex Moga, eth deputat de Lleida, Juan Riu e er enginhèr dera òbra, Enrique Regaño, an visitat er estat des òbres. Era demora ena subsitucion des linhes electriques per part de Fecsa Endesa a arretardit era òbra que se prevé que finalize eth pròplèu me de seteme. Autant er ajuntament de Vielha e Mijaran coma era pedania an demanat ara Diputació eth soterrament des linhes electriques, atau coma des servicis basics coma lum, gas e telefon.
D’aute biais, aguesta dimenjada, Vilac celebrarà era sua Hèsta Major, damb un programa plen d’actiuetats en eth que i poden remercar era missa deth dissabte entàs 12de meddia en aunor a Sant Fèlix damb era còca e moscatelh qu’ara seguida aufrirà era EMD, tot çò acompanhadi pera charanga Los del Cinca. Entàs 19 ores eth grop de dances Còlha de Santa Maria de Mijaran actuarà ena Plaça Major, e ath ser i aurà session de balh entà toti. Entà dimenge ath meddia i aurà era hèsta dera esluma e ena tarde jòcs infantils.
Coma nauetat er ajuntament inaugurarà eth dissabte es naui servicis publics. Segontes Rella damb aguesta iniciatiua s’auferís ath visitant un servici qu’actuaument ei inexistent en pòble ja que non i a cap bar ne restaurant. Eth nau servici, adaptat a minusvalids, se contemple operatiu entàs visitants des rotes guidades entara glèisa de Sant Fèlix de Vilac, temple romanic deth segle XII, o deth campanar, un des mès polidi dera Val d’Aran. Actuaument amassa damb eth pòble de Bossòst son es unics que dispausen de banhs publics.