Era biblioteca de Vielha aufrís eth servici “Diaris deth Mon” entà nauvingudi, toristes e estudiants.

Vielha,. Era Bibliotèca Generau de Vielha, de titolaritat municipau, dispause d’un servici especiaument util autant entàs nauvengudi coma entàs toristes que visiten eth municipi. Eth servici “Diaris deth Mon” permet era consulta de lèu 200 diaris de 60 païsi e en 20 lengües diferentes. Era iniciatiua, que compde damb eth supòrt dera Generalitat de Catalunya, permet obtíer mejançant tecnologia via satèllit ua còpia exacta dera edicion en papèr des diaris que se publiquen en tot eth mon. Segontes era directora dera bibliotèca, Anna Garcia, ath delà d’aufrir ua vision multiculturau ara ciutadania, se vò aufrir un servici util entàs toristes e nauvengudi ja que permet eth seguiment dera actualitat deth sòn país. Tanben en gessen beneficiadi es estudiants d’idiòmes en tot reforçar er estudi des lengües estrangères. Ath cant de diaris coma The Washington Post, Le Monde, La Stampa o eth Frankfurtes Allgemeine Zeitung, es usatgèrs tanben pòden consultar títols coma Clarin (Argentina) Tianjing Ribao (China), El Colombiano (Colòmbia), Manila Times (Filipines) enter d’auti.
D’aute biais era direccion deth centre a presentat eth balanç d’actuacion der an 2008, qu’inclodís un totau de 49 activitats realizades. Exposicions, talhèrs, lectures de condes, visites escolares e collaboracion en mieis de comunicacion son quauques des actuacions amiades entà dauant e qu’an obtiengut ua assisténcia de lèu un milèr de participants. Tanben s’a incrementat eth numerò de prèst en çò que tanh ar an anterior damb un totau de 22.049 prèsts, hèt que demòstre qu’era bibliotèca de Vielha ei tanben un centre de relacion e sociabilitat a on era poblacion i trape informacion, educacion e léser.
En çò que tanh ath volum de connexion a internet mejançant es ordinadors deth centre s’a vist redusit leugèrament en tot passar des 7-500 consultes as 6.900. Tot e qu’a favor s’a incrementat er usatge deth servici wifi damb un totau de 2.100 sollicituts deth servici.
Era bibliotèca de Vielha e Mijaran tot e èster un equipament municipau ei utilizat en un 50% per vesins de dehòra deth municipi. A compdar deth 25 de junhsèga, er equipament se higerà ar orari d’ostiu e per tant non s’auferirà eth servici enes tardes des dissabtes.