Era remodelacion dera Plaça dera Cal de Betren melhore er entorn urban deth nuclèu

Betren.- Er ajuntament de Vielha e Mijaran a iniciat es òbres dera melhora integrau dera Plaça dera Cal de Betren profitant es ajudes as Entitats Locaus der Estat- Tot e qu'aguesta actuacion non se contemplaue en plan d'actuacions tath 2009, er ajuntament a priorizat era actuacion ja qu'era sua remodelacion a de melhorar substanciaument era estructura viària deth nuclèu. Era Plaça dera Cal de Betren presentaue fòrtes irregularitats e un mau estat de conservacion que provocaue problèmes enta evacuar es aigües en situacions de pluja. Damb es naues òbres s'a melhorat eth hilat de sanejament, d'abastiment d'aigua e de gas ja qu'eth numerò de segones residencies ei fòrça important en epòca de mès demana. Tanben s'an installat naui servicis basics coma telefonia e linhes electriques soterranhes.

Entara pavimentacion dera plaça s’a seguit era madeisha tipologia de materiaus iniciada damb eth renauiment deth carrèr Major de Betren en 2008. Ena Plaça dera Cal i e plaçada era Glèisa de Sant Estèue deth segle XII ath XIV ena que podem destacar eth timpan dera pòrta e era estructura dera façada damb cares en relèu. Entà reauçar era majestuositat deth temple, er ajuntament de Vielha e MIjaran acondicionarà eth perimètre damb ua zòna verda evitant atau eth parcatge de veïculs. Atau madeish s’acondicionarà un airau taht descans en eth que s’i plaçarà mobiliari urban e ua hònt. Er ajuntament prevé era fin dera òbra tath pròplèu mes d’agost. Era remodelacion dera plaça dera Cal de Betren a supausat ua inversion de 95.640 €.