Er alcalde de Vielha e Mijaran, Pau Perdices, considère intolerable eth naut index d’accidents dera N-230

Vielha.- Er alcalde der ajuntament de Vielha e Mijaran, Pau Perdices, a lamentat era grauetat der accident que s’a produsic aué en Vielha en punt quilometric 160 dera N-230 damb eth resultat d’un mòrt e un herit grèu. Er accident s’a produsit entàs 8 deth maitin quan un torisme a tustat frontaument damb un camion ar auançar. Eth conductor e eth copilòt deth torisme son dus vesins de Vielha.
Parallèlament ara N-230 ena nautada de Forcat, ena comarca vesia dera Ribagorça, s’a produsit un nau accident ath capvirar-se un camion petit damb eth resultat d’un herit
Aguesti dus sinistres meten nauament de manifèst eth mau estat dera via e er urgent besonh dera sua melhora, qu’a estat reclamada constantment pes autoritats locaus. Segons Perdices ei intolerable eth naut index de sinistralitat dera N-230 e ei incomprensibla era demora per part deth Ministerio de Fomento entà solucionà’c.

Perdices rebrembe qu’eth municipi de Vielha e Mijaran ei ara demora per part deth Ministerio, de recéber eth projècte definitiu de melhra dera N-230 en tram que va des dera Boca Nòrd a Vielha e rebrembe qu’enes darrèri mèsi es incidéncies an estat peth dessús dera mieja, e ara que malerosament es ciutadans de Vielha son acostumadi.

”Ei incomprensible que diàriament se produsisquen talhs intermitents ena via, ja sigue per accident o peth simple hèt de que dus camions non se poguen crotzar en determinadi punts degut ara estretor dera cauçada”. Es talhs tanben afècten ath nau tunèl de Vielha damb arturades superiores as 10 menutes peth pas de marchandises perilhores, ja qu’eth projècte de reforma deth tunèl vielh se manten paralizat tot e es promeses de melhora.