Luis Franco, director des Serveis Territorials de Justicia de Lleida, destaque era idoneïtat deth nau jutjat de Vielha

Vielha.- Aguest meddia eth director des Serveis Territorials de Justicia de Lleida, Luis Franco, acompanhat der alcalde Vielha e Mijaran, Pau Perdices, e deth jutje de Prumèra instància e Instruccion de Vielha, Javier Vázquez, an hèt era prumèra visita d’òbres as dependéncies deth futur jutjat de Vielha.
Franco a remercat era idoneïtat der espaci ar èster plaçat en còr de Vielha pera melhora des accesi qu’açò compòrte. Segon eth director territorial, es òbres auancen d’acòrd damb çò previst e ei fòrça probable qu’era bastissa sigue prèsta en pròplèu mes de noveme, e que per tant poderie èster operatiua entà prumeries der an que ven. En aguest sentit er alcalde de Vielha e Mijaran, Pau Perdices, s’a mostrat esperançat en melhorar er accés ath nau jutjat damb era dubertura d’un nau viau qu’amassarie era Plaça Corralets damb era Avenguda Castièro, èish principau de Vielha. Eth terren per a on se projècte aguest viau ei de titolaritat deth Ministeri de Foment e er ajuntament confie en arribar a un acòrd entara sua cession en tot melhorar era mobilitat deth casc urban.
D’aute biais, er ajuntament ei ara demora de recéber eth finançament der 1% culturau deth Ministeri de Foment que permeterà remodelar eth Passeg dera Libertat de Vielha, damb ua inversion de 800.000€, que complementarà er espaci deth jutjat en tot crear un airau liure de veïculs e destinada as vianants, en centre de Vielha. Er alcalde cree qu’era remodelacion supausarie ua importanta dinamizacion economica dera zòna.