Via liura entath bastiment de pisi protegidi en Vielha e Mijaran

Vielha.- Era Direcció General de Promoció d’Habitatge a trauèrs der Institut Català del Sòl, bastirà 12 naues viuendes de proteccion oficiau en carrèr Anglada de Vielha. Aguesta promocion se hig a ua dusau que s’està amiant entà dauant en Solan de Vielha damb 15 viuendes e 15 parcatges naui qu’en totau, sumen 27 naues viuendes protegides en municipi de Vielha e Mijaran.
Era visita aué deth Director Generau de Promoció de l’Habitatge, Joaquim Gascó i Palacin e deth Director adjunh der Alt Pirineu i Aran des Serveis Territorials a Lleida, Oscar Augé, a permés era collaboracion entre aguestes dues institucions ena signatura d’un convèni que modifique eth signat en gèr de 2006 e que hè referéncia ath bastiment de 35 viuendes en solar deth cinèma de Vielha.
Era modificacion deth convèni limitarà eth bastiment a 15 viuendes que se plaçaràn eh solar que i a ath cant deth cine de Vielha e en eth qu’actuaument i a plaçat eth frontón. Se manten atau eth cinèma de Vielha, ja qu’ei er unic equipament culturau que i a en Aran, çò que permet qu’es vesins poguen contunhar gaudint deth madeish.

Entà suplir era reduccion de viuendes, er alcalde de Vielha e Mijaran, Pau Perdices, a propausat ath Departament d’Habitatge dues naues parcèlles urbanizables entà destinar-les ath bastiment de viuendes protegides.
Ua d’eres de 700 m2 correspont ath plan parciau nº 2 de Betren e ena que se i poderàn bastir 10 viuendes en regim de loguèr e era auta correspon ara zòna Còto Maró , en centre de Vielha, que coma fegura urbanistica siguec dejà aprovada ena darrèra comission d’urbanisme en tot èster pendenta deth projècte d’urbanizacion. En aguesta parcèlla de 800 m2, se i pòden bastir 20 viuendes mès, ja sigue en regim generau o ben concertat. Perdices tanben a manifestat er interès der ajuntament entara promocion d’abitatges enes auti nuclèus deth municipi, enes que dejà s’amien entà dauant promocions coma ei eth cas de Gausac o Casau, entre d’auti.

En çò que tanh ara promocion des Anglades, se calcule qu’es òbres poderien començar ara fin de 2009, dempús dera redaccion deth projècte executiu. Tanhent ara promocion d’Eth Solan se destinaràn es abitatges a un loguèr de 10 ans damb opcion a compra.
Dempús dera signatura deth convèni, Perdices, Gasó i Augé an visitat es òbres dera promocion de viuendes que s’amie entà dauant en Solan, iniciades en an 2008, damb eth bastiment de 20 viuendes de loguèr, e qu’an prevista era sua finalizacion tath mes de noveme d’enguan.