Vielha met en foncionament eth skatepark entara practica esportiua

Vielha.- Es aficionadi ath patinatge dispausen des d’aguesta setmana dera naua installacion esportiua municipau de skatepark de Vielha. Era junta de govèrn der Ajuntament de Vielha e Mijaran aprobèc eth projècte e òbra der skatepark eth passat mes d’abriu, entot formar part d’un ambiciós projècte qu’a de convertir era zòna d’Eth Solan en un gran complèxe esportiu damb era futura construccion dera piscina descubèrta, deth fronton e d’ua pista poliesportiua.
Eth còsso d’espòrts der ajuntament, Alex Moga, a remercat qu’eth nau equipament a de corbir es besonhs des aficionadi ad aguesta disciplina esportiua e que desde hè fòrça ans reclamauen eth bastiment d’ua pista que complisque damb es paramètres legaus. Era zòna reservada entara practica deth monopatin s’a plaçat ath cant deth nau Palai d’Espòrts e a auut un còst de 33.000 èuros. Des de hè ans, es aficionadi ar “skate” utilizauen mobiliari urban entàs sues practiques esportiues, çò qu’ocasionaue quauqua queisha per part des vesins. Eth nau equipament, resolerà es inconvenients e assegurarà ua practica responsabla e damb totau seguretat. Des de que s’a metut en foncinament, era utilizacion dera pista ei lèu diària, per part des joeni que practiquen aguest espòrt. Enes pròplèus dies, er ajuntament de Vielha e Mijaran acondicionarà es entorns entà melhorar es accéssi ara installacion.