Er ajuntament premanís un cuertmetratge entà mostrar era integracion deth collectiu immigrant en municipi

Vielha.- Metjaçant un cuertmetratge er ajuntament de Vielha e Mijaran vò mostrar era integracion deth collectiu immigrant en municipi. Actualment, er equip responsable deth projècte ei trebalhant ena localizacion des actors e es espacis entà poder iniciar eth rodatge de forma immediata. Er objectiu ei mostrar era bona conviuença des ciutadans d’origen estrangèr ena societat aranesa. Apréner era lengua aranesa, es costums e era istòria dera Val d’Aran son quaques des prepauses enes que trebalhe er ajuntament des de hè ans entà poder coesionar as naui ciutadans.

En aguest sentit, ara fin de seteme e començament d’octobre lèu 40 persones immigrantes participèren en ues activitats de coneishement der entorn enes que impartiren nocions sus eth nau lòc de residéncia, era istòria e es costums deth pòble aranés. Era activitat consistic en una visita guidada ath musèu dera Lan de Vielha e ar ecomusèu Çò de Joanchiquet de Vilamòs.

Eth projècte de crear un cuertmetratge receb eth supòrt deth Departament d’Acció Social i Ciutadania dera Generalitat de Catalunya. Un còp realitzat eth vidèu d’acuelhuda se difonerà pes escòles, centres, organismes, empreses e entitats deth municipi. Era lengua utilizada pes actors amateurs serà er aranés e se mostrarà eth sòn àmbit laborau, sanitari, culturau, d’abitatge o educatiu, entre d’auti. Eth cuertmetratge aurà ua durada de 30 menutes.

Eth collectiu immigrant en municipi de Vielha e Mijaran ei de 1.666 persones, un 28,8% dera poblacion (cens actual de Vielha e Mijaran de 5.770 persones). Era poblacion immigrada mès nombrosa procedís de Romania (581 ciutadans), seguit de Argèlia (220 ciutadans), Marròc (200 ciutadans), Colòmbia, Portugal, Equador, França, Argentina, Republica Dominicana e Bolivia.