Comerçants e estudiants analizen era afectacion dera futura Lei Comerciau de Catalunya

Era consultora empresariau e professora universitària, Mercè Clavel, expausèc ager deluns ath dauant d’un plan nombrós grop de comerciants e estudiants, era afectacion dera naua directiua europèa en ahèr de comèrç e era naua Lei deth Comèrç catalan, aguèsta darrèra encara per aprovar.
Era charrada auec lòc entàs 8.30 hores deth matin en otèl Acevi de Vielha en tot hèr a servir un format innovador de conferéncia-esdejoar impolsat per Ajuntament de Vielha e Mijaran. Lèu 40 persones participèren en acte qu’auec, coma objectiu principau, dar a conéisher es modificacions der entorn comerciau, frut dera naua lei, e eth papèr des comerçants entà adaptar-s’i.
Clavel apostèc per ua major integracion deth sector damb er hilat associatiu entà melhorar era gestion conjunta. Tanben defensèc era formacion e un modèl de ciutat compacta ena qu’era activitat comerciau a d’èster coesionada en determinades trames urbanes. Segontes Clavell, Vielha a de melhorar era sua capabilitat comercial e adaptar-se as naui besonhs des consumidors.

PROGRAMA “QUALIFICA’T”

D’aute biais, eth professor der IES d’Aran, Paco Robles, expausèc as empresaris assistents eth nau programa “QUALIFICA’T” qu’impolsen amassa Departament de Treball i Educació damb er objectiu de melhorar era qualificacion des persones que se trapen en situacion de caumatge o empreses que volguen melhorar en formacion . Er IES d’Aran ei un des 60 centres en Catalunya omologat en impartir aquest plan. Segontes Robles, er Institut d'Aran desvoluparà eth programa entàs familhes de cicles formatius d'espòrts, gestion administrativa e informatica.
Robles tanben manifestèc qu’eth programa ei pensat entà que persones e empreses tròben era orientacion, eth reconeishement e era formacion professional que melhor s’adapte as besonhs de cadun. Totes es persones que participen en programa poderàn auer ua certificacion parcial o total entara obtencion dera titulacion de formacion professional.