Conformitat entre es vesins entà qu’eth Passeig dera Libertat de Vielha sigue liure de veïculs

Vielha.- Era amassada damb lèu 40 des vesins deth Passeig dera Libertat de Vielha a resultat deth tot satisfactòria, a afirmat er alcalde de Vielha e Mijaran, Pau Perdices, qui s’amassèc damb es afectats pera remodelacion d’aguest lòc centric dera vila.
Toti es assistenti coincidiren ena oportunitat de melhora que supausarà era naua urbanizacion deth passeig avalorada en pròp de 860.000 èuros, des quaus 290.000 èuros provieràn dera aportacion der 1% cultural deth Ministeri de Foment aprovada eth 4 de noveme e ua subvencion de 440.637 èuros deth Pla d’Obres i Serveis dera Generalitat. Er alcalde viatjèc entà Madrid tà materializar era subvencion autrejada pera entitat estatau.
Er envielhiment deth passeig e era manca d’actuacions pendent lèu 40 ans auie malmetut eth caractèr comerciau d’aguesta via principau. Ara, damb eth projècte de melhora se pretén revitalitzar er eish comerciau de Vielha damb era restriccion dera circulacion de veïculs e era proïbicion der estacionament en aguest punt. Es otelèrs e comerçants demanèren garanties ar Ajuntament entà mantíer es servicis de càrrega e descàrrega en otèls e comèrci damb çò qu’er Ajuntament i siguec d’acòrd .
Damb era futura urbanizacion, se permeterà ua circulacion rodada controtlada, sense possibilitat de parcatge e en un unic sentit. Es òbres començaran passada Setmana Santa e se calcule qu’eth nau passeig poderie èster acabat a principis deth mes de agost. Er alcalde se mostrèc satisfèt pera comprension des vesins ena afectacions que pòden auer per es òbres pendent eth temps previst.
Es vesins profitèren era amassada entà sollicitar era urbanizacion des carrèrs des entorns coma eth carrèr Anglada, eth carrèr Bergàs e eth Camin Reiau, ua demana qu’ estudiarà eth consistòri. Segons Perdices, ei ua prioritat der equip de govèrn daurir era zòna der antic otèl Internacional que permeterà era union dera plaça Mossèn Joan Casseny damb era avenguda Castièro entà dar mès esponjositat e fluxe ath centre dera vila. Athdelà, er Ajuntament s’a compromés a urbanizar era plaça Sant Orènç, era placeta Corralets e eth carrèr Estret aguest 2010.
Er alcalde de Vielha e Mijaran ei ara demora qu’eth Departament de Política Territorial i Obres Públiques dera Generalitat de Catalunya collabòre ena urbanizacion de tot aguest sector, ua demanan qu’er alcalde a hèt a arribar ath director general d'Arquitectura i Paisatge deth Departament de Política Territorial e Obres Públiques (DPTOP) dera Generalitat, Joan Ganyet.