Era Bibliotèca de Vielha celèbre eth ueitau aniversari damb naues actiuetats infantiles e juveniles

Vielha.- Es responsables dera bibliotèca de Vielha trabalhen ena celebracion deth ueitau aniversari damb un calendari d’actiuetats qu’auràn lòc pendent es mèsi de noveme e deseme. Era prumèra actiuetat s’amièc a tèrme eth 21 de noveme damb eth títol “Eth circ des piudes” a càrgue de Beatriz Martin. Era actiuetat, inclodida ath laguens deth programa “Nascuts per llegir”, introdusís as petits de 0 a 3 ans ena istòria d’un circ de piudes (era familha piudosa, es piudes dançarines, es piudes palhasses etc..). Era narratiua se hec de forma interdisciplinària utilizant materiaus coma plastilina, monaques, illustracions e esturments.
Deth 3 ath 20 de deseme, era bibliotèca acuelharà era exposicion “A pencar! Eth mon deth trabalh es libres infantils e juvenils” produsida per CLICJCAT (Consell Català del Llibre Infantil i Juvenil) a on se mostrarà coma se ve eth mon laborau e era descubèrta des professions a trauèrs des libres infantils e juvenils catalans. Era exposicion cònste de 9 banderòles e un centenat de libres sus desparières classificacions.
Entath pròplèu 19 de deseme entàs 18.00 ores, era bibliotèca acuelharà er espectacle “Musica Diboishada” a cargue de Lluís M. Bosch e Carolina Rius. Se tracte d’un talhèr de musica entara mainadèra de 3 a 8 ans concebut damb era intencion d’explicar qué ei, qui ei e qué è un compositor. Entà explicà’c, es autors utilizaràn musica, fantasia, imaginacion e diversion apropan era musica as mès petiti.
Eth madeish dia entàs 20.00 ores aura lòc era actuacion “Quan els músics canten l’amor” a cargue de Lluís M. Bosch e Carolina Rius. Damb eth compositor Lluís M. Bosch pasaram ua estona agradiua parlant sus era musica inspirada en amor. Entà qu’era experiéncia sigue mès seductora, era pianista Carolina Rius, l’acompanharà damb musica en dirècte.
Atau madeish e enquiath dia 31 de deseme, era Bibliotèca acuelharà era exposicion deth concors de fotografia organizat pera Oficina de Joenessa (ECA) damb era collaboracion der Ajuntament de Vielha e Mijaran.