Joeni der Espaci Joen de Vielha, protagonistes deth programa de TV• “Tot un Mon”

Vielha.- Eth programa de Televisió de Catalunya, “Tot un Mon”, mostrèc en un reportatge eth trabalh der Espaci Joen de Vielha a trauèrs de dus des sòns usatgèrs, Nedso de Brasil e Toño de Les, es que a trauèrs dera musica hip-hòp compartissen mès qu’aficions.

Er Espaci Joen de Vielha siguec eth lòc trigat entà mostar un petit reflèxe dera vida d’agusti dus membres deth grop “Sin Hip Hop No Hay Crew”, format per joeni de desparièrs origens amassadi per aguesta expresion culturau e que hèn a servir er Espaci Joen coma plataforma de creacion e entà assajar.
Ath long de tota ua jornada, er equip de TV3 entrevistèc as joeni e mostrèc eth trabalh diari der Espaci Joen de Vielha. Era tecnica de joenessa, Maria Cinta Castillo, ei ath dauant d’aguest equipament singular entàs joeni, plaçat ena Avenguda Pas d’Arró 7 de Vielha. Er equipament juvenil ei destinat a toti es joeni deth territòri e aufrís desparièrs servicis d’informacion e assessorament as joeni. Er espaci ei equipat damb un fotbolin, taula de ping-pòng, e ordinadors damb conexion a internet entà auferir alternatiues de léser. Ath delà se programen periodicament talhèrs e actiuetats adreçades ad aguest collectiu. Segon Castillo, er objectiu der Espaci Joen ei dar ua responsa integrau as besonhs, inquietuds e demanes des joeni.

VEURE VIDEO