Toti es alcaldes dera Val d’Aran diden NON ara incursion d’ Aran ath laguens dera Vegueria der “Alt Pirineu i Aran”

Vielha.- Dempús de conéisher er auantprojècte de lei dera organizacion veguerial de Catalunya er Ajuntament de Vielha e Mijaran convoquèc ager, en mens de 24 ores, a toti es alcaldes dera Val d’Aran damb caractèr de urgéncia entà dar ua responsa unitària e contundenta ara prepausa d’incorporar a Aran ath laguens dera Vegueria der Alt Pirineu i Aran.

Es nau alcaldes dera Val d’Aran signèren un document en eth que refusen era incorporacion d’Aran ena Vegueria der Alt Pirineu i se reafirmèren ena voluntad de non inclodir Aran en cap Vegueria ne division territoriau de Catalunya que non sigue era madeisha, atau coma s’establís ena Lei 13/1990 deth Regim Especiau dera Val d’Aran.
Segontes er alcalde de Vielha e Mijaran, Pau Perdices, non se pòt trincar era referéncia istorica d’ans de reconeishement politic, identitari e culturau deth nòste terriòri. Ei sense dubte eth darrèr capítol de ua manèra de hèr e actuar deth govèrn actuau de Catalunya que des der inici, en an 2003, a mostrat ua manca de reconeishement autant a nivèu polític coma institucionau e que ara se manifèste ena naua division territoriau.
Er alcalde s’a mostrat crític pera pòga ambicion política deth Sindic d’Aran coma maxima fegura institucionau ena defensa des intèresi deth territòri e a sollicitat ua amassada urgenta damb eth maxim dirigent entà prepausar era redaccion conjunta deth document de rehús ara naua division territoriau.