Vielha met en foncionament eth Club Bagaleu, un nau espaci infantil de jòcs

Vielha.- Vielha dispause des deth passat dia 5 de deseme deth Club Bagaleu, un espaci infantil plaçat ena prumèra planta deth Palai de Gèu e deth qu’en pòden èster sòcis toti es mainatges e mainades. Eth club ei pensat damb dobla finalitat: ua qu’era mainadèra pogue passar estones agradiues de jòc e diversion e era dusau qu’es pairs e familhes dispausen per prumèr viatge d’un lòc d’aguestes característiques.
Ei ua zòna abilitada damb un parc infantil, holables, ua pantalha damb projeccion de contienguts infantils, un karaòke, materiau entà liéger, diboishar e pintar e jòcs e joguets adaptadi as ans dera mainadèra que lo visiten. I a tanben un espaci de cafeteria dubèrt a totes es familhes e usargèrs dera pista de gèu, piscina e des desparièrs equipaments deth Palai de Gèu. Eth paviment d’aguest airau ei premanit entà qu’era maiandèra i pogue anar sense caucèr.
Eth Club Bagaleu a creat un abonament mesadèr, pensat entà afavorir-ne eth sòn usatge il.limitat es dies e ores que pogue èster mès de besonh as pairs o que volguen es mainatges.
Eth nau servici comencèc a foncionar eth passat dia 5 de deseme damb un prètz d’entrada individuau de 6 èuros damb temps il.limitat. Tanben s’auferissen descompdes familhars que van entr es 10€ se ei eth dusau hilh o 12€ se son tres o mès hilhs. Existís era possibilitat d’un abonament mesadèr de 30€ per nen. En eth cas de dus o mès germans eth prètz ei de 40 o 50€ respectiuament.
Er espaci infantil de Vielha ei dubèrt toti es dies dera setmana: damb orari de 17 a 20 ores de deluns a dijaus; de 17 a 21 ores es diuendres; e es dissabtes , dimenges e hestèrs de 12 a 14 ores e de 17 a 21 ores.
En club se i celèbren tanben hèstes d’aniversari e i a servici de “cangor” entàs pairs o mairs qu’agen de besonh de hèr gestions e non pòden anar acompanhadi pes sòns hilhs. Segontes eth dusau Tinent d’Alcalde e Còsso d’Espòrts, Cultura e Joenessa der Ajuntament de Vielha e Mijaran, Àlex Moga, damb aguest nau servici s’amplie era aufèrta de léser deth municipi destinat a petiti e a grani en tot ampliar es prestacions der equipament municipau entà que sigue mès versàtil. Er ajuntament trabalhe actuaument ena edicion de materiau de promocion deth nau servici e pròplèument se daurirà ua web pensada entàs petiti el grani, ath delà s’a abilitat un telefon d’informacion (902118964)