Eth nau fronton de Vielha melhorarà era zòna esportiua dera vila

Vielha.- Eth nau fronton de Vielha poderie èster près en pògui mèsi, dempús de qu’era òbra a estat dejà adjudicada provisionaument ena junta de govèrn locau deth dia 30 de juriòl ara empresa Construccions Mil.lenium Cerdanya S.L. Eth nau equipament municipau se plaçarà ath darrèr deth Palai d’Espòrts de Vielha e supausarà ua inversion de 150. 890 èuros e que se pagarà en part gràcies a ua subvencion deth Conselh Català de l’Esport de 35.000 €.

Era execucion dera pista esportiua ar aire liure apta entà jogar a fronton se plaçarà en un solar de proprietat municipau, ena Avenguda Garona. Era naua pista se destinarà sustot ar espòrt escolar, espòrt recreatiu e entreniment entara poblacion, sense èster un fronton destinat ara competicion der espòrt federatiu.

Eth plaç d’execucion se prevé que non sigue superior as quate mèsi des der inici des òbres. Damb aguest nau equipament se complemente era zòna esportiua que forme part d’un projècte globau de complèxe esportiu ena vila en eth qu’ei previst era construccion dera piscina descubèrta e ua naua pista polisesportiua ar aire liure.

D’aute biais, era actuau installaciion deth fronton plaçada ath cant deth cine de Vielha serà esbaussada entà executar-i era naua promocion de 15 viuendes de proteccion oficiau impolsades per Ajuntament de Vielha e Mijaran e era empresa publica INCASOL e des que dejà se signèc er acòrd corresponent eth passat mes de junhsèga.

Naua illuminacion en solar des antigues casèrnes militares

Vielha e Mijaran.- Er ajuntament de Vielha e Mijaran a iniciat aguesta setmana es òbres d’illuminacion deth parcatge public e espaci ar aire liure deth solar des antigues casèrnes militares. Eth projècte d’illuminacion valorat en 76.700€, servirà tanben entà illuminar possibles eveniments ar aire liure, degut ara bona acceptacion qu’a aguest format entre era poblacion.
Er ajuntament trabalhe entà renauir e melhorar er aspècte dera vila gracies a un ambiciós projècte que s’inicièc ara hè mèsi damb eth demoliment des casèrnes e era posteriora urbanizacion deth solar e melhora der entorn. Iniciades es òbres, s’an metut de manifèst es mancances en illuminacion e en poténcia electrica que requerís un espaci d’aguestes caracteristiques. Actuaument aguest espaci no dispausaue d’un enlumenat public capable d’illuminar tot eth parcatge, atau coma de preses electriques que permeten eth foncionament des equips d’illuminacion, imatge e son, e d’auti que pòden èster de besonh entà celebrar eveniments, çò qu’obligaue as organizadors a auer de dispausar de grops electrògens.
Entà poder solucionar aguestes mancances se plaçaràn dues colomnes de 16 mètres de nautada equipades damb 6 fòcus de 200 w cad’ua e se crearàn naui punts de lum enes que poder connectar quan i age eveniments (fires, carpa d’activitats, grops musicaus, eca..)

Er ajuntament de Vielha e Mijaran suspén era iniciatiua Vielha en Carrèr

ES AFECTACIONS ENES VIES N-230 E 28 AN ESTAT DETERMINANTES
Er ajuntament de Vielha e Mijaran a decidit suspéner era inictaiua Vieha en Carrèr, dempús dera evaluacion dera prumèra edicion celebrada eth passat dia 8 d’agost. Es afectacions as dues vies principaus, era N-230 e era C-28, an estat eth motiu dera suspension. En aguest sentit,er Alcalde de Vielha e Mijaran, Pau Perdices, s’a mostar partidari d’evitar naui incidents enes pròplèus edicions previstes.
Eth tancament ath transit eth passat dissabte dia 8 d’agost dera avenguda Castièro e Pas d’Arró provoquèc retencions plan importantes enes principaus accesi ara vila.
Aguest hèt a estat determinant entara suspension dera actiuetat.
Pendent es amassades prealables ar eveniment damb eth sector toristic e comerciau de Vielha se comuniquèc que celebrada era prumèra jornada s’evaluarien es resultats. Auent en compde qu’es resultats non an estat es que se demorauen er ajuntament a pres era decision de suspéner era actiuetat dempús de comunicà’c as responsables dera associacion “Começ rde Vielha” e evitar atau naui incidents.
Abantes de préner aguesta determinacion, autant er alcalde Pau Perdices coma eth 2au. tinent d’alcalde, Alex Moga, s’amassèren damb es representants dera associacion de comerciants entà estudiar es possibles solucions sense arribar a cap acòrd.
“Vielha en Carrèr” a estat ua apòsta dificila auent en compde que non i auie cap referent prelable que determinèsse era sua acceptacion. Non mos lamentam d’auer sajat d’organizar ua actuacion pionèra e ath viatge arriscada ja que credem que poderie auer estat beneficiosa autant entàs ciutadans coma entàs pròpris comerçants” a manifestat er alcalde.
“Vielha en Carrèr” ei ua iniciatiua der ajuntament de Vielha e Mijaran e dera Associacion de Comerçants de Vielha que compde damb eth supòrt deth Grèmi d’Ostalaria dera Val d’Aran e deth Conselh Generau d’Aran

Er ajuntament convertís un antic abocador tarcumèr en un passeg fluviau

Vielha e Mijaran.- Er Ajuntament de Vielha e Mijaran mejançant era Agència Catalana de Residus ha convertit un antic tarcumèr plaçat ath cant der arriu Garona en un passeg fluviau. Hè lèu 2 ans, er ajuntament inicièc es tramits entara neteja deth marge der arriu en un tram d’un quilomètre plaçat en centre de Vielha. Des de hè ues setmanes, era Agència Catalana de Residus realize era adaptacion e era recuperacion dera vegetacion autoctòna en aguesta zòna e dejà an retirat mès de 2000 mètres cubics de tarcums.
Eth tarcumèr ère eth resultat dera incorrècte gestion enes òbres d’adaptacoin deth solar des casèrnes militares en un parcatge, iniciat en 2007, en tot èster alavetz Alcalde de Vielha, Juan Riu er actual cap dera oposicion d’Unitat d’Aran. Enes òbres entà adaptar eth solar se soterrèc eth tarcum apròp deth marge der arriu, entot elevar eth nivèu superficiau e creant un fòrt impacte mediambientau e païsagistic.
Ara, gracies ara aportacion de 52.000 € (35.000 € dera Agència Catalana de Residus e 16.000 € der Ajuntament) s’a podut recuperar ua zòna verda entara vila.
Era recuperacion païsagistica e ambientau der espaci fluviau dera Garona entà Vielha e Mijararn ei ua apòsta que hec Convergéncia Democratica Aranesa (CDA) en an 2006 per part der ex-Sindic d’Aran, Carlos Barrera, quan s’aprovèc era prumèra intervencion en tram que i a entre Vielha e Betren melhorant es canalizacions e collectors d’aigües residuaus en aguest nuclèu.
Damb era naua intervencion, eth municipi a guanhat un passeg fluviau de mès de dus quilomètres qu’amasse es dus nuclèus e que forme part d’un projècte mès ambiciós de recuperacion der espaci fluviau. Atau madeish er ajuntament de Vielha e Mijaran a incentivat era practica der espòrt damb era installacion d’equipaments esportius en desparièrs punts deth recorrut, entà completar eth circuit de fitness ar aire liure.

Gausac e Vielha daurissen es inscripcions entà pisi de loguèr a prètzi redusidi

Vielha e Mijaran.- Er Ajuntament e Vielha e Mijaran e era Entitat Municipau Descentralizada de Gausac auferissen pisi de loguèr a prètzi fòrça redusidi. En nuclèu de Gausac, era pedania a reformat un atic de 90 m2 damb 5 abitacions, codina, minjador e banh entà aufrir-lo de loguèr a un prètz d’entre 350 a 450€ mesadèrs. Era reforma començèc ara hè us mèsi gracies ath finçament procedent deth plan d’inversions locaus de 27.000€ que a permés renauir era installacion electrica, eth tancament des hièstres, era reforma dera codina, eth banh e era compra d’electrodomestics coma nevèra, lauadora o secadora.
Er inmòble proprietat dera pedania, dispause de 5 viuendes de loguèr repartides en 4 plantes e plaçat en centre deth pòble. Aguest atic auie estat logat a un logatèr que lo deixèc en fòrça males condiciones que no permetien era sua abitabilitat e usatge. Era codina e eth banh se trapauen fòrça deterioradi, damb eth mobiliari trincat e es installacions en males condicions. Es umitats per manca de ventilacion auien hèt a mauven es parets de totes es abitacions. Ath dauant d’aguesta situacion era enitat municipau promoiguec era reabilitacion dera viuenda entà perméter eth sòn usatge en condicions dignes d’abitabilitat. Ara, un còp finalizada era òbra, er ajuntament estudie era manèra d’evitar casi d’impagament o actes incivics. Segontes er alcalde de Gausac, Jesús Ordóñez, ei un probèm ath que abituament a de hèr front era pedania. “Es fiances o es bones referéncies non tostemp foncionen”” puntualize Ordoñez. Tot e es bones condicions economiques, eth sector inmobiliari en Aran a queigut considerablement damb ua aufèrta qu’actuaument supère era demana existenta.

D’aute biais, er ajuntament de Vielha e Mijaran mejançant er INCASOL a daurit era convocatòria entra adjudicacion de tres abitatges de proteccion oficiau en règim de loguèr, dues d’eres entà joeni menors de 35 ans. Ua des viuendes ei plaçada en carrèr Sarraèra de Gausac, dispause de 88.60m2 damb tres dormitòris e plaça de parcatge. Es autes dues son ena Avenguda Maladeta de Vielha, damb 33,63 m2 e 33,59 m2 cad’ua damb un dormitòri e plaça de parcatge. Era sollicitut se poderà arremassar en Ajuntament de Vielha e Mijaran o ben descargar-la des dera web municipau www.vielha-mijaran.org , e calerà presentar-laen madeish ajuntament abantes deth dia 17 de seteme, en orari de deluns a diuendres de 9 a 14 ores.

Dubèrt eth plaç entara es viuendes de proteccion oficiau en Vielha e Mijaran

Ena linha de trabalh iniciada e prioritària en matèria de viuenda, er Ajuntament de Vielha e Mijaran informar de que s’a daurit eth plaç de presentacion de sollicituts entà toti aqueri vesins e vesies que, complint es requisits de besonh, siguen interessadi en accedir a ua des 3 viuendes de proteccion oficiau en regim de loguèr, plaçades en:
- Carrèr Sarraèra de Gausac: Ua viuenda de 88,60m2 damb 3 domitòris e plaça de parcatge.
- Avenguda Maladeta de Vielha: Dues viuendes 33,63 m2 e 33,59m2 cad’ua damb un dormitòri e plaça de parcatge, entara joenessa menor de 35 ans.

Era sollicitut se poderà arremassar en Ajuntament de Vielha e Mijaran o ben descargar-la des dera web municipau www.vielha-mijaran.org , e calerà presentar-la en madeish Ajuntament abantes deth dia 17 de seteme de 2009 en orari de deluns a diuendres de 9 a 14 ores.

• Sollicitut d'inscripcion. (Descarregar PDF)


• Informacion e condicions. (Descarregar PDF)
  

Era entitat municipau de Gausac reforme es airaus infantils entà adaptar-les ara normativa actuau.

Era Entitat Municipau Descentralizada de Gausac a amiat entà dauant era reforma des airaus recreatius infantils deth nuclèu- Er antic pati der estudi de Gausac e un espaci verd ena zòna de Es Anglades an estat reformadi o adaptadi as naues normatiues.

En pati der antic estudi, s’an substituit es vielhs balançadors per uns de naui entot plaçar-i tanben bancs e paperères entà qu’es vesins e vesies poguen gaudir d’agueste centrica plaça. Era actitut incivica de cèrti vesins que permeten qu’es sòns animaus de companhia defèquen en airau infantil a obligat ar ajuntament a cercar solucions a un problèma fòrça dificil d’apraiar coma ei er incivisme. Atau madeish s’a installat un pipican ena entrada der airau entà evitar en çò possible aguestes actuacions

Ena zòna de Es Anglades, era EMD de Gausac a promoigut eth bastiment d’un nau parc infantil damb era finauetat d’establir un airau recreatiu en aquera zòna residenciau un shinhau aluenhada deth centre dera vila. Es òbres que s’an amiat entà dauant an estat eth desboscament e moviment de tèrres entot reforçar eth perimètre damb trauessès de husta. Tanhent ath paviment des dues zònes s’i a plaçat un revestiment de lòses de cauchó enes airaus de jòc. Tanben s’an plaçat dus naui punts d’enlumenat public en parc infantil, atau coma ua hònt d’aigua potabla e er equipament de jòcs infantils. Totes dues actuacions an auut un pressupòst de 71.000€ qu’a estat finançadi en par pera EMD e per hons d’inversion locau der Estat.