FORFETS TEMPSADA D'ESQUÍ 2009-10

FORFETS TEMPSADA D’ESQUÍ 2009-2010.
Exclusiu entàs vesins residents en municipi

Er Ajuntament de Vielha e Mijaran a daurit eth tèrme entà que toti aqueri vesins residents en eth municipi que volguen auer eth forfet d’esquí dera estacion de Baquèira Beret entad aguest iuèrn, ac poguen tramitar a trauèrs d’aguest Ajuntament, e es condicions entà auer-lo son:

- Èster en cens municipal d’abitants damb ua antiquitat minima de 5 ans, en tot èster resident en aguest municipi.
- Acreditar qu’es principaus hònts d’ingressi s’obtien ena Val d’Aran, e en cas de menors d’edat, acreditar es deth/dera cap de familha. Atau madeish, es sollicitants menors d’edat auràn d’èster inscrits en un centre escolar dera Val d’Aran.
- En tot cas, es vesins que non agen complit ath començament dera tempsada es 6 ans d’edat e es qu’en aquera madeisha data agen 70 o mès ans, s’acuelheràn as condicions generaus dera estacion d’esquí en tot auer eth forfet o abonament gratuït.

Es modalitats de forfets previstes son:
- Infantil dera Val: 90,00€ que s’aplicarà ara mainadèra de 6 a 16 ans inclodidi, sense limitacion d’usatge.
- Especiau Juvenil dera Val d’Aran: 90,00€ que s’aplicarà as joeni de 17 a 22 ans inclodidi, damb era limitacion de que non serà valid entàs dies de saturacion dera estacion, ei a díder: dimenjades, hèstes, pònts e vacances, atau coma s’especifique en forfet.
- Adult dera Val d’Aran: 600,00€, sense limitacion d’usatge.
- Especiau Adult dera Val d’Aran: 350,00€. Damb era limitacion de que non serà valid entàs dimenjades, hestèrs, pònts e vacances, atau coma s’especifique en forfet.

Er impòrt d’aguesti forfets s’aurà de hèr efectiu ena oficina de “LA CAIXA”, plaçada ena Av. Pas d’Arró núm 7 de Vielha, en compde 2100-0035-01-0200302706, e eth justificant deth madeish calerà presentar-lo ena Secretaria der Ajuntament, amassa damb ua fotografia damb eth nòm complèt, edad, sèxe, nautada, ua fotocòpia deth DNI e calerà ramplir era huelha d’inscripcion que se vos facilitarà en madeish Ajuntament.

Eth tèrme d’inscripcion serà enquiath dia 23 d’octobre de 2009, en orari de 09,00 enquiàs 14,00 de deluns a diuendres.

L’alcalde Pau Perdices reclama més temps per analitzar el Pla Director d’Urbanisme de l’Aran

L'alcalde sol·licita ampliar el termini fins al gener del 2010
Vielha.- L’alcalde de Vielha e Mijaran, Pau Perdices, s’ha mostrat crític per l’incompliment formal de la Direcció General d’Urbanisme de la Generalitat de Catalunya en no facilitar amb temps suficient el Pla Director d’Urbanisme de la Val d’Aran per poder-ho analitzar i poder presentar les al·legacions pertinents. Segons l’edil, el document es troba a disposició de la comissió territorial d'urbanisme de la Val d'Aran. des del passat 31 de juliol. Aquesta setmana s’ha expossat a exposició pública però l’ajuntament no ha tingut accés al document fins avui.

Malgrat el temps del que es disposa ( 45 dies d’exposició pública i 30 dies més pels ajuntaments) no és temps suficient per analitzar la complexitat del document. Perdices considera que és necessari ampliar el termini ja que cal estudiar amb deteniment tot allò que afecta al municipi. En aquest sentit, l’alcalde sol·licitarà l’ampliació del termini fins a gener del 2010..

PLA DIRECTOR D'URBANISME VAL D'ARAN

Vielha recupère era antiga escòla Garona coma naua Aula de Formacion d’Adults

Eth cambi de plaçament dent centre amplie es possibilitats de formacion des abitants deth municipi

Vielha.- Es installacions dera antic estudi CEIP Garona de VIelha an estat reabilitades entà acuélher es naues dependéncies dera Aula de Fomracion d’Adults. Eth centre barrat des de hèr tres ans, degut ara construccion deth nau Centre d’Educacion Primària en Betren, a estat reformat en sòn interior entà acuélher desparièrs servici educatius coma era Aula de Formacion d’Adults, eth Centre de Recursi Educatius e er Equip d’Assessorament Pedagogic.
Era bastissa a dues plantes e un pati exterior, utlizat actuaument coma zòna de parcatge public. Era reforma a consistit en abilitar desparières aules, dues des quaus se destinaran a aprenentatge, ua aula a sala d’informatica, ua auta entà professors e ua bibliotèca.
Era bastissa de titolaritat municipau a estat cedida ath Departament d’Eduació entà acuélher es naui servicis. Era inversion des òbres entà acondicionar-lo a estat de 48.337 €, pagadi peth Departament d’Educació.
Er inici des classes se harà efectiu eth dia 21 de seteme e segontes es organizadors se prevé un increment des inscripcions en un 100% superant es 200 alumnes.
Era aufèrta formatiua deth centre se base en: cicle de de formacion instrumental I, II e III; preparacion d’accés ath cicle formatiu de grad miei; lengua catalana I e II; lengua francesa I e II e graduat en educacion segondària (a distància des deth IOC). Er orari des corsi serà ena tarde a compdar des 15 ores e era matricula serà gratuïta. Er exit de quauques assignatures coma lengua catalana e francesa a ramplit totes es places disponibles.
Segontes er alcalde de Vielha e Mijaran, Pau Perdices, eth cambi de plaçament dent centre amplie es possibilitats de formacion des abitants deth municipi e centralize es servicis formatius en Vielha.
Er ajuntament de Vielha e Mijaran ei ara demora, tot e eth compromís prés a començaments d’an, dera resolucion favorabla entara desafectacion deth solar qu’a d’autrejar eth Departament d’Eduació. Ua part dera bastissa (era mès antiga) ei declarada en roïna ar èster afectada per alluminòsi e ei pendenta d’esbaussament.

Acòrd entre er ajuntament e Televisió Sense Fronteres entara creacion dera television publica en Aran

"Er acondicionament deth local serà inmediat" (Josep Adolf Estrader)

Vielha.- Er ajuntament de Vielha a cedit un local de 145 m2 ara empresa Televisió Sense Frontertes S.L., ua des tres concessionàries dera TDT Aran entà auançar ena creacion deth futur centre de Produccion e Doblatge en aranés.
Eth passat dissabte 5 de seteme se presentèc eth nau local plaçat enes baishi dera bastissa deth Palai de Gèu, a pògui mètres dera bibliotèca municipau. Era visita deth Director de Televisió Comtal e responsable de Televisió Sense Fronteres, Josep Adolf Estrader permetec conéisher damb detalhs eth futur foncionament deth centre.
Er equipament dispausarà d’un contròtle tecnic, sala de readaccion un platò de television entara produccion de materiau pròpri coma informatius o magazines e ath delà s’auferirà eth servici entà que pogue èster contractat per empreses extèrnes. Segontes Estrader, er acondicionament deth local serà inmediat e er inici dera emision depenerà der acòrd damb es autes concecionàries de television digitau en Aran, Lleida Televisió (Grop Segre) e eth Consòrci Teledigitau Aran creat entre es ajuntaments de Naut Aran, Bossòst e Vielha e Mijaran. “Plantejar tres canals de TV en Aran ei ua utòpia, per açò ei de besonh amassar esfòrci damb es concessionàries que dejà an mostrat er interès e eth compromís de amia’c entà dauant” a manifestat Estrader. Ath delà, eth centre de produccion d’Aran tanben contèmple era creacion d’ua emisora de ràdio municipau ja qu’er Ajuntament a aprovada era freqüéncia publica.
Segons er alcalde de Vielha e Mijaran, Pau Perdices, eth futur centre de produccion de doblatge daurirà era possibilitat de collaboracions extèrnes ja qu’er objectiu ei impolsar produccions en occitan entà escambiar damb eth país vesin. “Ei era nòsta obligacion mantíer era lengua. En aguest sentit, es mieis publics son un complement fòrça important” declarèc er alcalde Perdices.

Exit de participacion ena prumèra Jornada Tecnologica sus Programari Liure

Vielha.- Era Sala d’Actes der ajuntament de Vielha e Mijaran amassèc eth passat dissabte dia 5 de seteme a mès d’ua ventea de participants ena prumèra jornada tecnologica organizada peth consistòri e inclodida ath laguens deth plan d’actuacions deth projècte Alt Pirineu Digital@Vielha.
Eth president de CatPL (Associació Catalana d’Empreses per al Programari Liure), Albert Calvet i Alfons Rubio, Director Gerent deth Col.legi Oficial d’Enginyeria en Informatica de Catalunya, siguéren es que se n’encuedèren de promòir un plan animat collòqui sus eth Programari Liure.
Pendent lèu dues ores, es participans resoléren dubtes ena aplicacion e er usatge deth Programari Liure. En aguest sentit, era preséncia de professionaus deth sector derivèc era jornada didactica en professionalizada e damb er analisi de casi practics.
Eth Programari Liure (en inglés free software) ei eth programari que se pòt hèr a servir, estudiar e modificar sense restriccions, e que pòt èster copiat e redistribuït. En hilat actuaument i a ua grana aufèrta de programes gratuïts que pòder èster utilizadi e que mos dan similares prestacions que es de pagament. Er objectiu dera charrada a estat eth d’introdusir ara ciutadania en concèpte de libertat de software. Era jornada finalizèc damb una breu introduccion as hilats dubèrti a cargue de Jordi Ossó, membre de www.guifi.net.
Er airau de Naues Tecnologies a programat un cicle de conferéncies tecniques sus desparièrs aspèctes venculadi as Tecnologies dera Comunicacion e Informació (TIC). Eth cicle ei format per 4 jornades: Programai Liure, Empresa e TIC, Tecnolan’09 e Blogs: ua identitat personau. Era pròplèu jornada se celebrarà eth dia 25 de seteme e virarà ath torn dera empresa e tecnologia impartida per assessor especializat en sector toristics des Alps Italians, Kurt Illmer.

Vielha recupère era Memòria Istorica damb er aumenatge ara “Compañía de Escaladores, Esquiadores de Vielha”

"Er espaci a tornat a guanhar era dignitat qu'auie perdut" (Pau Perdices, Alcalde de Vielha e Mijaran)

Vielha.- Representants institucionaus e militars participèren eth passat dia 5 de seteme en acte d’aumenatge ara “Compañía de Escaladores y Esquiadores de Vielha” organizat pera associacion de veterans damb eth supòrt dera Ajuntament de Vielha e Mijaran. Un totau de 200 veterans procedenti de fòrça endrets d’España se retrobèven en un acte cargat d’emotivitat.
Eth Sindic d’Aran, Frances Boya, arregraïc er acte organizat per Ajuntament, en tot definir-lo coma un trabalh de recuperacion dera memòria istorica. Pera sua part, er Alcalde de Vieha e Mijaran, Pau Perdices, manifestèc que s’a volut arregraïr eth traball desvolopat pera companhia pendent es 35 ans que dèc servici ath territòri e que dèc supòrt ath pòble en moments fòrça dificils coma es aiguats der an 1982 o enes rescats en nauta montanha. “Eth barrament des casèrnes militares en an 2000, e eth traslat dera companhia entà Jaca non pòt hèr a desaparéisher era memòria deth pòble” manifestèc Perdices.

Eth Generau Cap dera Prefectura de Tròpes de Montanha, Gumersindo Veiga, se mòstrèc arregraït per acte deth consistòri. Ena sua intevencion, Veiga declarè qu’era companhia desvolupèc un trabalh que merquèc un estil pròpri e que s’a sajat de mantièr-lo ath long des ans.

Era convocatòria siguec massiva damb era assisténcia de gent procedenta de tota España, hèt que se metec de manifèst damb eth naut vòlum de visites entath blòg creat pera associacion (http://esquiadoresescaladoresdeviella.wordpress.com) damb mès de 250.000 visites en un mes de publicacion.
Eth bastiment d’un monolit damb er escut en pèira dera companhia guarnís dejà era entrada deth parcatge a on antigament i auie plaçaces es installacions dera companhia. Er estat d’abandonament en eth que se trapaue era bastissa des antigues casèrnes militares e eth mijador, motivèren ath cosistòri ath sòn esbaussament eth passat mes de junh. Actuaument eth solar s’a destinat a ua zòna de parcatge damb naues zònes vèrdes e un airau de descans. Segontes Perdices, er espaci a tornat a guanhar era dignitat qu’auie perdut. Er acte concludic damb un dinar popular.

D’aute biais, eth consistòri manten dubèrtes es negociacions damb eth Ministèri de Defensa entà retirar er unic edifici que se manten de pè en un estat de deteriorament e abandonament considerable.

Er alcalde de Vielha reclame mès seguretat en accés a Betlan

Betlan.- Betlan.- Eth crotze dera carretèra de Betlan damb era N-230 presente un naut index de perilhositat. Atau ac a declarat er alcalde de Vielha e Mijaran, Pau Perdices, qu’a reclamat ua melhora der accés ad aguest nuclèu deth municipi. Era pòga visibilitat e era proximitat d’un reviron barrada aumente era inseguretat des conductors. Ei per
aguest motiu, qu’er alcalde a manifestat eth besonh de melhorar-ne era seguretat en aguest tram degut ath naut vòlum de transit que registre era carretèra nacionau

Er Ajuntament reducís en un 12% es despenes dera Hèsta Major

Vielha.- Er ajuntament de Vielha e Mijaran a decidit redusir eth còst dera Hèsta Major de Vielha en un 12%. Aguesta reduccion non afectarà ath numerò de dies hestèrs que se mantine en 7, deth 5 ar 11 de seteme. COma en edicions anteriores, eth programa ei dividit en desparières tematiques: Vielha en Digitau, era Cultura Urbana, Festivau d’Ostiu, en aunor ara Mare de Diu de Mijaran, era Net Tematica, III Festivau d’Espòrt Rurau de Vielha, ua Societat Activa.
Nauament era comission a programat desparières actiuetats adreçadi a tota era poblacion. Cau remercar era aumenatge ara “Compañia de Escaladores y Esquiadores de Vielha” que se premanís entath dia 5 de seteme damb era preséncia de plan nauti cargues der exercit.
Se reprén eth Campionat de Tria Vila de VIelha tath dia 6 de seteme ena tarde e que compdarà damb era participacion de lèu ua vintea d’esportistes que demostraràn es sues abilitats en Cap dera Vila e en parcatge des antigues casèrnes militares.
Enguan era comission a decidit dedicat era Net Tematica as “Cultures deth Mon” pera diuersitat culturau que conviuen en municipi.
Era benvenguda des Reines e Dames d’Aunor dera Hèsta serà eth dia 7 damb eth tradicionau “Chupinazo”. Eth programa se complète damb exposicions, charrades, exibicions, castèth de huecs artificiaus e balh ath long des dies.

Dubèrt eth dusau periode entà sollicitar subvencions

En matèria d’espòrt, musica, joenessa, servicis sociau, torisme, hèstes, eduacion e cooperacion.

Vielha. Er ajuntament de Vielha e Mijaran a daurit eth dusau periode d’inscripcions entà optar as subvencions ena organizacion d’actes e actiuetats tanhentes as airaus que seguissen: espòrt, musica, joenessa, servicis sociaus, torisme, hèstes, educacion e cooperacion. Era quantitat autrejada anarà en foncion dera finauetat entara que se demane era ajuda. Es actiuetats subvencionades auràn de desvolopar-se abantes deth dia 31 de deseme d’enguan.
Pòden optar as ajudes es persones fisiques o agropacions de persones fisiques o juridiques, publiques o privades, comunautats de bens o quinsevolh aute tipe d’unitat economica. Eth plaç de presentacion des sollicituts finalize eth dia 30 de seteme.

Lèu 300 patinaires nacionaus e internacionaus s’entrenen en Palai de Gèu aguest ostiu

Vielha.- Un totau de 227 patinaires procedenti de clubs d’Espanha, Itàlia, França, Estats Units e Republica Checa an trigat era installacion municipau deth Palai de Gèu de Vielha entà premanir era pròplèu tempsada esportiua. Des 227 patinaires, 177 an participat en Stage de Patinatge qu’organize cad’an VIGESA, gestora dera entitat municipau Palai de Gèu.
Pendent es mèsi de juriòl e agost, a trauèrs de 7 jornades tecniques, es patinaires s’an podut entrenar e premanir entara pròplèu tempsada. Segontes Nathalie Pardos, membre dera organizacion der stage, eth trabalh tecnic a estat fòrça interessant ja qu’es patinaires procedien de centres de naut rendiment esportiu e aguest hèt enriquís as patinaires dera Val e as pròpris tecnics.
Parallèlament ar stage qu’organize eth Palai, s’an amiat entà dauant stages de desparièrs clubs privadi. En aguest sentit s’a aufertat era possibilitat d’aquerir un forfet especiau a un prètz redusit. Entre es clubs assistenti destaquen er Skating Camp Internacional damb ua participacion de 17 mainatges e mainades, eth TGS Danza procedent de Toulouse damb es 26 participants, eth club N’ICE STYLE de Madrid damb 27 participants e eth BPG de Toulouse damb 34 participants.
Finalizades es jornades, eth dia 15 d’agost se celebrèc era Gala de Patinatge que compdèc damb era participacion dera patinaira nordamericana, Oliya Clarkson qu’auferic ua plan bona interpretacion de Michael Jackson. Tanben i participèc era campiona de França e numerò 12 deth ranking mondiau juvenil, Mae Berenice.
Es dies 29 e 30 de seteme se celebrarà un triangular de Hockey damb era participacion deth FC Barcelona , Txuri Urdin (San Sebastian) e eth Club Hockey Gèu Aranés.

Mès d’un centenat de vesins e vesines participen en sopar d’afrairament de Gausac.

Gausac.- Es dies 14,15 e 16 d’agost eth pòble de Gausac celebrèc era sua Hèsta Major damb era participacion de 130 persones qu’anèren entath sopar d’afrairament enes antigues escòles deth pòble. Ei era dusau edicion deth sopar organizat pera Comission de Hèstes damb ua plan bona responsa per part des vesins e vesies. En aguest sentit, er alcalde pedani, Jesús Ordóñez, se mostrèc fòrça satisfèt pera implicacion des vesins enes actes celebradi, entre eri, era professon en aunor a Sant Ròc. Atau madeish Ordóñez volec arregraïr era dedicacion der equip dera Comission que per tresau an consecutiu a organizat es actes dera hèsta deth pòble.