Ua trentea d’empresaris participen en “Esdejoar foro” sus naues tecnologies

Vielha.- Lèu 30 persones participeren aguest deluns ena jornada empresariau “Es claus entà un comèrç de futur" impolsada per ajuntament de Vielha e Mijaran. Era iniciatiua, adreçada ath sector empresariau de Vielha e Mijaran, auec coma objectiu informar as empresaris sus es naues oportunitats de negòci qu’aufrissen es naues tecnologies.

Damb un format innovador, er ajuntament organizèc un esdejoar empresariau presentat per Santiago Sánchez, Conselhèr Delegat dera empresa Conzentra, empresa especializada en servicis de desvolopament global de negòcis en canal d’Internet. En aguest prumèr “esdejoar-foro” se tractèren concèptes coma: eth marketing per Internet, era venda per internet o es naues oportunitats entàs PYME.

Era excellenta formacion e experiéncia de Sánchez ( engenhaire superior de telecomunicacions pera UPC; Master en Business Administration e collaborador de Master en La Salle) permetec as assistents ampliar es sòn coneishements e afrontar naui reptes de cara ath futur.

Tath proplèu mes de noveme, er ajuntament de Vielha e Mijaran aufrirà un aute esdejoar empresariau entà tractar era Futura lei comerciau de Catalonha, qu’anarà a cargue de Mercè Clavel, licenciada en Ciéncies Empresariaus. Màster en Direccion d'Empreses per ESADE, Consultora empresariau. Professora universitària.

Era iniciatiua s’inclodís ath laguens eth projècte VIELHA DIGITAU, damb eth supòrt deth projècte Alt Pirineu Digital e eth plan AVANZA der Estat que comprén ua sèrie d’actuacions coma formacion e accions de difosion d’iniciatiues tanhentes damb es TIC.

Convocatoria de subvencions deth Departament d'Educacion. Beques de desplaçament e de residència

Qui ac pot demanar
Alumnat que corse ensenhaments postobligatoris de formacion professionau, ensenhaments artistics d'arts plastiques e dessenh e ensenhaments esportius en centres educatius de Catalonha sostengudi damb hons publics e residís enes comarques de baisha densitat de poblacion.

Terme enta presentar es sollicituds
Enta sollicitar aguestes ajudes se poden adreçar tara Oficina de Joenessa, plagada enes baishi deth Palal de Geu, en orari d'atencion ath public: deluns, dimercles e diuendres de 10:00 a 15:00 ores, dimars e dijaus de 10:00 a 13:00 e de 15:00 a 18:00 ores. Eth terme enta presentar es sollicituds sera enquiath propleu dia 16 de noveme de 2009.
Ne poden ester beneficiaris es estudiants que complisquen es requisits.

Mès informació ene document adjunt: INFORMACION BEQUES

OFICINA DE JOENESSA: 973 640625

Er ajuntament de Vielha e Mijaran redusís es quòtes des abonadi deth Palai de Gèu coma mesura anticrisi

Vielha.- Er ajuntament de Vielha e Mijaran mejançant era empresa VIGESA, gestora deth Palai de Gèu, a decidit mantíer o redusir es quòtes des abonadi ara installacion entara naua tempsada.

Era decision d’aplicar aguestes mesures s’entén coma ua ajuda as abonadi en un moment de fòrta crisi economica. Segontes eth dusau tinent d’alcalde de Vielha e Mijaran e còsso d’espòrts, Alex Moga, era gestion der ajuntament enes darrèri dus ans va encaminada a aplicar mesures d’estauvi entàs ciutadans, coma per exemple, era congelacion des deth 2007 des quòtes dera escòla mairau e era reduccion en d’auti concèptes economics.

En aguest sentit, es abonadi ath Palai gaudiràn d’ua reduccion entre un 5% e 3,5% enes quòtes annaus en foncion de s’eth sòci ei empadronat. Coma nauetat tanben desapareish era quòta mesadèra amassa damb era matricula des adults individuaus. Se manten eth prètz dera quòta trimestrau e se redusís en 10 èuros era quòta semestrau. Fin finau, as sòcis infantils e juvenils (de 4 a 17 ans) se les aplique ua unica quòta

Vielha acuelh pendent tres dies eth “Bus de les Professions”

Vielha.- Vielha a acuelhut eth “Bus de les Professions”, ua iniciatiua deth Departament d’Educacion dera Generalitat que forme part deth plan de formacion e orientacion tàs joeni. Pendent dus dies, els alumnes d’ESO, e Cicles Formatius an agut era oportunitat de poder visualizar e informar-se in situ dera aufèrta formatiua que existís en Catalunya.
Eth Plan Bolonia, era sua afectacion atau coma es gessudes professionaus de cada ua des familhes educatiues an centrat era informacion que s’a facilitat as joeni d’Aran. Eth “Bus de les Professions” arribèc eth passat dimarts e s’a installat ena plaça dera Generalitat de Vielha a on i serà enquià aué.
Era visita, que dure 60 menutes, apuprètz, a dues parts. Ua prumèra correspon ara presentacion, damb supòrt audiovisual, des caracteristiques dera formacion professionau e es corresponenti cicles formatius ath laguens deth sistèma educatiu. Ara seguida s'auferís ua visita guidada ena que s'expliquen es caracteristiques des desperières familhes professionaus.
En declaracions deth Tinent d’Alcalde der ajuntament de Vielha e Mijaran, Àlex Moga, eth “Bus de les Professions”, ei ua ocasion, que pendent ans a estat ath servici der estudiant entà ajudar-lo a decidir e/o informar-se sus ua des decisions mès importantes que a de forma immediata.
En orari de tarde, des 17:30 a 19 ores, eth bus ei dubèrt ath públic en general, entà informar sus es desparièrs estudis post-obligatòris, sus es Programes de Garantia Social, sus es naues tecnologies e tanben sus es besonhs de tecnics especialistes en es diuèrsi sectors.

Er ajuntament premanís un cuertmetratge entà mostrar era integracion deth collectiu immigrant en municipi

Vielha.- Metjaçant un cuertmetratge er ajuntament de Vielha e Mijaran vò mostrar era integracion deth collectiu immigrant en municipi. Actualment, er equip responsable deth projècte ei trebalhant ena localizacion des actors e es espacis entà poder iniciar eth rodatge de forma immediata. Er objectiu ei mostrar era bona conviuença des ciutadans d’origen estrangèr ena societat aranesa. Apréner era lengua aranesa, es costums e era istòria dera Val d’Aran son quaques des prepauses enes que trebalhe er ajuntament des de hè ans entà poder coesionar as naui ciutadans.

En aguest sentit, ara fin de seteme e començament d’octobre lèu 40 persones immigrantes participèren en ues activitats de coneishement der entorn enes que impartiren nocions sus eth nau lòc de residéncia, era istòria e es costums deth pòble aranés. Era activitat consistic en una visita guidada ath musèu dera Lan de Vielha e ar ecomusèu Çò de Joanchiquet de Vilamòs.

Eth projècte de crear un cuertmetratge receb eth supòrt deth Departament d’Acció Social i Ciutadania dera Generalitat de Catalunya. Un còp realitzat eth vidèu d’acuelhuda se difonerà pes escòles, centres, organismes, empreses e entitats deth municipi. Era lengua utilizada pes actors amateurs serà er aranés e se mostrarà eth sòn àmbit laborau, sanitari, culturau, d’abitatge o educatiu, entre d’auti. Eth cuertmetratge aurà ua durada de 30 menutes.

Eth collectiu immigrant en municipi de Vielha e Mijaran ei de 1.666 persones, un 28,8% dera poblacion (cens actual de Vielha e Mijaran de 5.770 persones). Era poblacion immigrada mès nombrosa procedís de Romania (581 ciutadans), seguit de Argèlia (220 ciutadans), Marròc (200 ciutadans), Colòmbia, Portugal, Equador, França, Argentina, Republica Dominicana e Bolivia.

Era Ciberaula de Vielha acuelh corsi de GPS, descargues e introduccion ara informatica e internet

Vielha.- Trincar er analfabetisme digitau ei un des objectius deth programa Alt Pirineu Digital@Vielha damb eth supòrt deth plan AVANZA der Estat . En aguesta linha, er ajuntament de Vielha e Mijaran a programat naui corsi formatius de cara ara tardor: cors d’introduccion ara informatica e internet, talhèr de GPS e talhèr de descargues per internet.

Eth pròplèu 20 d’octobre s’iniciarà eth cors d’Introduccion ara informatica e internet que se realizarà es pròplèus 20, 22, 27, 29 d’octobre e , 5, 10, 12, 17 i 19 de noveme de 19.30 a 21.30 ores. Eth cors ei estructurat en 20 ores entà poder auferir as participants ua sèrie de concèptes basics que les permete enténer eth mon dera informatica des d’un nivèu iniciau. Eth cors ensenharà concèptes coma: er ordenador, es components, es sistèmes de fichèrs, es programes, es cercadors, eth corrèu electronic e es sistèmes de seguretat en hilat, entre d’auti. . Er exit artenhut ena prumèra edicion, celebrada eth passat 8 de junh, provoquèc ua lista de demora d’interessadi en participar-i.

Parallèlament s’an programat quate talhèrs (dus de GPS e dus de descargues per Internet). Eth 26 d’octobre se realizarà eth prumèr talhèr de GPS sus es sues desparières utilizacions, atau coma es aplicacions informatiques associades ath madeish. Er orari deth talhèr serà de 14.30 a 17.00 ores e ei limitat a 16 places. Eth dusau talhèr aurà lòc eth pròplèu 28 d’octobre de 19 a 22 ores. Non son de besonh coneishements prealables.

Fin finau es talhèrs de descargues per internet auràn lòc eth 2 e 4 de de noveme de 19.00 a 22.00 ores e s’ensenharà a descargar archius der hilat de manèra segura ath delà de concèptes coma: copy right, copy left, P2p, Mp3. Es talhèrs auràn ua durada de 3 ores e son limitadi a 16 places.

Autant eth cors coma es talhèrs se realizaràn ena Ciberaula-Punt Tic de Vielha plaçada en prumèr pis deth Casau deth Jubilat. Eth cors a un prètz de 50 èuros e es talhèrs de 12 èuros cada un, damb una reduccion deth 50% entàs empadronadi en Vielha e Mijaran e deth 75% entà era gent de mès de 65 ans deth municipi.

Er ajuntament organize esdejoars empresariaus entà dinamizar eth comèrç dera vila

Vielha.- “Es claus entà un comèrç de futur" ei eth nòm deth nau programa de difusion sus naues teconologies adreçades ath sector empresariau de Vielha e Mijaran. Era iniciatiua impolsada per ajuntament de Vielha e Mijaran a er objectiu d’informar as empresaris sus es naues oportunitats de negòci qu’auferissen es TIC (Tecnologies dera Informacion e Comunicacion).

Mejançant d’un format innovador, er ajuntament organize dus esdejoars-foro que se celebraràn eth pròplèu dia 26 d’octobre e eth 30 de noveme. Eth prumèr esdejoar aurà lòc en Hotel Aran La Abuela de Vielha entàs 8.30 ores a cargue de Santiago Sánchez, Conselhèr Delegat dera empresa Conzentra qu’ei especializada en servicis de desvolupament global de negòcis en canal Internet. Aguesta empresa a eth sòn origen en sies empreses especializades, operatives desde 1995, compde damb burèus en Barcelona, Madrid, Girona e Argentina e trebalhe entà 500 empreses.

En prumèr esdejoar-foro se tractaràn ahèrs coma eth marketing per Internet, véner per internet o es naues oportunitats entàs PYME. Sánchez ei engenhaire superior de telecomunicacions pera UPC ingenier (Universitat Politècnica de Catalunya), MBA (Master in Business Administration) per EAE, professor adjunt ara UPF (Universitat Pompeu Fabra) e collaborador de Master en La Salle.

Era activitat ei inclodida ath laguens deth projecte VIELHA DIGITAU, damb eth supòrt deth projècte Alt Pirineu Digital e eth plan AVANZA der Estat que comprén ua sèrie d’actuacions com era formacion e accions de difusion d’iniciatiues relacionades damb es TIC

Hèira de Vielha 2009. XXIIIau Concors de Bestiar

PROGRAMA 8 d'octobre
10.00 ores: Esdejoar popular aufrit per Ajuntament de Vielha e Mijaran en recinte firau, plaçat en pati des antigues casèrnes militars.
Des 10.00 enquias 11.00 ores: inscripcion deth bestiar participant
11.00 ores: Avaloracion des exemplars per part detj jurat
12.30 ores: Entrèga der incentiu d'assisténcia as pagesi participants e repartiment de prèmis