Demore desèrta era subasta dera finca des casèrnes militares en Vielha, proprietat deth Ministèri de Defensa

Vielha.- Era subasta que s’auie de celebrar diuèndres passat en Madrid tanhenta a era finca proprietat deth Ministèri de Defensa, plaçada en solar des antigues casèrnes militares de Vielha, a quedat desèrta. Eth prètz de gessuda decretat peth Ministèri sus era finca, de 3.000 mètres quarrats, ei de 12.837.300 èuros, ua quantitat excessiva segontes er alcalde de Vielha e Mijaran, Pau Perdices, auent en compde era queiguda deth prètz deth solèr urban, promoiguda pera crisis.
Aguèst ei eth dusau còp qu’ eth Ministeri trè a subasta era finca, era prumèra ocasion siguec en an 2003, quan s’adjudiquèc a ua empresa de Madrid per 15,6 milions d’èuros dempús de èster disputada per 25 empreses. Era venda deth solar jamès se hec efectiua ja qu’ es compradors non efectuèren eth pagament.
Er alcalde de Vielha e Mijaran, Pau Perdices, a manifestat qu’ en cap cas era subasta dera finca hè perillar era viabilitat deth parcatge de 400 places recentament inaugurat. Atau madeish, Perdices considère que era parcèlla ei subervalorada e, per tant, que reclamarà ath Ministèri que s’ajuste ath valor real entà que pogue gésser ath mercat.
Era venda deth solar possibilitarà era urbanizacion de tota era zòna damb ua inversion de 2,5 milions d’èuros e un important desvolupament dera actiuetat comercial e economica de Vielha coma centre de servicis ena Val d’Aran. Ath delà, era venda deth solar significarà dispausar de mès parcatge e un parc public ordenat en centre dera vila damb ua zòna urbanizada damb trepaders e viadèrs publics.

Er ajuntament de Vielha e Mijaran incremente en un 0% es impòsti entath 2010

Vielha.- Er ajuntament de Vielha e Mijaran laguens dera sua facultat d’ incrementar es impòsti non a realizat cap increment entar an 2010. Laguens der Impòst de Béns Inmòbles (IBI), es valoracions cadastraus qu’influissen en eth madeish son determinades peth Ministerio de Economía y Hacienda qui decrète es revisions d’ aguesti valors. En eth cas de Vielha e Mijaran se realizèren en 2001, quan eth Ministèri decretèc que era pujada se realizarie anuaument en un 10% en tot èster obligatòri acatar era decision deth Ministèri.

En comparacion damb d’autes ciutats, coma per exemple Lleida o Tremp, un pis de 90 mètres quarrats damb ua base liquidabla de 32.800 èuros supause un impòst de 243 èuros en Lleida e de 260 èuros en Tremp quan en Vielha ei de 206 èuros. Per tant, Vielha e Mijaran aplique ua taxa der IBI moderada en comparacion damb autes ciutats vesies.
Tot açò respon ara decision deth govèrn local de congelar es impòsti mès dirèctes entath ciutadan coma ei eth cas dera guarderia que manten era taxa des de hè dus ans o en era disminucion des quòtes en eth Palai de Gèu. Era pujadada deth 0% enes impòsti forme part d’ un plan de accion sociau e economic qu’ aguest pròplèu mes de deseme se materializarà e potenciarà damb era contractacion de 9 persones ena situacion de caumatge e damb risc de renda familiara.
D’aute biais, er ajuntament de Vielha e Mijaran adjudique tota era òbra publica as empreses registrades en eth municipi de Vielha e Mijaran damb er objectiu de milhorar era actiuetat economica deth municipi.

Desmoliment der antic estudi de Vielha

PART DETH TERREN DERA BASTISSA SERÀ UTILIZAT ENTARA CREACION D’ UN AIRAU RECREATIU INFANTIL

Vielha.- Machines excavadores procediren a darrèra ora d’ager e ath long deth maitin d’aué ath desmoliment der edifici der antic estudi de Vielha, construït a mejans des ans 50. Er edifici confrontant ara actuau Escòla d’Adults de Vielha ère afectat per aluminòsi des de hè us ans.
Eth solar, de titolaritat municipau, auie estat cedit ath Departament d’Educació entara ubicacion des servicis educatius mès damb era construccion deth nau estudi CEIP Garona en an 2006 en Betren, er ajuntament reclamèc era desafectacion deth solar entà acuélher naui equipaments. Er acòrd artenhut er an passat a permés esbaussar er edifici e guanhar un nau espaci public.

Era bastissa esbaussada, de 400 mètres quarrats de superfícia construïda, s’utilizarà entara creacion d’un airau recreatiu infantil. Segontes er alcalde de Vielha e Mijaran, Pau Perdices, eth desmoliment respon ar acòrd damb eth Departament d’Educació dera Generalitat de Catalunya entà desafectar eth 70% de era finca de 2700 mètres quarrats entath plaçament d’equipaments municipaus. “En un prumèr moment ei prevista era creacion d’un àirau recreatiu infantil que l’afrontaram pendent er an 2010. Entad agusta tempsada, ei previst er increment deth parcatge public en aguest lòc e mes entà deuant un parcatge soterranh, a declarat Perdices.

Jornada de donacion de sang en Vielha

Era Associacion de Donants de sang dera Val d'Aran a organizat tath deluns dia 23 de noveme ua naua jornada de donacion de sang en Vielha. Er orari serà coma tostemp d'11 deth maitin enquiàs 21 ores deth ser ininterrumpudament e serà en Palai d'Espòrts de Vielha. Era actiuetat compde damb era collaboracion der Ajuntament de Vielha e Mijaran,deth Conselh Generau e deth Banc de Donants de Sang de Lleida.

Eth nuclèu de Vielha artenh era gasificacion ath 100%

Vielha.- Eth projècte der ajuntament de Vielha e Mijaran de gasificar eth 100% deth nuclèu de Vielha s’a complit damb era finalizacion des òbres completàries qu'an permés hèr arribar er hilat ara poblacion de Betren e er ampliament dera capabilitat d'emmmagasematge de gas propa damb era naua construccion de dus depòsits ena zòna d’equipaments de Bèusa. Era empresa Repsol Gas complís atau eth compromís adoptat damb eth consistòri en an 2000 de gasificar era totalitat deth nuclèu.

Es òbres de construccion des dus naus depòsits de gas propan permeten dar servici as nuclèus de Vielha, Betren e Gausac. Es naues installacions dupliquen era capabilitat actuau damb 240.000 kg corbint es besonhs energetiques dera poblacion. Es òbres an consistit ena creacion de dus depòsits, ua caudèra e un vaporizador.
Segontes er alcalde de Vielha e Mijaran, Pau Perdices, era empresa a responut satisfactòriament damb eth compromís adoptat er an 2000, maugrat es molèsties qu'an significat entàs vesins en quaqui moments deth bastiment det hilat. Se prevé qu’ena primauera s’inicie eth bastiment d’un nau depòsit enes nuclèus d’Escunhau e Casarilh que ja dispòsen dera canalizacion entath subministrament de gas, en tot preveir que pendent er iuèrn 2010-11 aguestes dues poblacions dispòsen dejà d'aqguest servici. Actuaument es pòbles d’Aubèrt, Betlan, Mont, Betren, Vielha e Gausac dispòsen de sistèmes operatius de gas, era majoria damb era companhia Repsol Gas to e que n’i a d’auti que trabalhen en municipi.
Segontes responsables dera empresa Repsol Gas, era inversion realizada en nuclèu de Vielha sume lèu 2 milions d’euros. D’aguesta manèra se da responsa as usatgèrs que triguen aguesta energia e que se quantifiquen en 1300 nautes deth servici en eth nuclèu de Vielha. Eth consum de gas s’a triplicat enes darrèri ans.

Er ajuntament de Vielha e Mijaran reforme era cabana d’Auba e cree un corrau ramadèr

Vielha.- Er ajuntament de Vielha e Mijaran a iniciat es òbres de construccion d’un corrau ramadèr damb manja ena zòna d’Auba. Eth nau corrau s'a plaçat ath cant dera cabana deth pastor existenta e que a estat reabilitat entà un major profitament. Era zòna d’Auba constituís un àbitat de peishiu de nauta montanha utilizat peth bestiar dera zòna pendent es mesi d’ostieu. Es trabalhs s'an centrat en apraiament e manteniment dera cabana d’Auba e en eth barratge entà retíer eth bestiar. En çò que tanh ara cabana, s'an solucionat es desperfèctes en eth mobiliari e en pòrtes e hièstres atau coma actuacions en tet. Damb aguesta actuacion, er ajuntament, qu’ei eth promotor dera òbra, ajude a conservar eth patrimoni paissatgístic des montanhes e dar supòrt ath sector ramadèr dera zòna.

Er ajuntament de Vielha e Mijaran analize eth profitament deth bòsc d’Artiga e Pomèro entà definir es sòns usat ges

Eth trabalh de camp sus er estat actuau dera zòna forestau d’Artiga-Pomèro, plaçada en tèrme municipau de Vielha e Mijaran, ei qualificada coma ua des melhors dera Val d’Aran des d’un punt de vista paisatgistic

Vielha.- Er ajuntament de Vielha e Mijaran a iniciat es trabalhs entà definir eth plan d’ordenacion forestau dera zòna d’Artiga-Pomèro damb er objectiu d’analizar eteh profitament deth bòsc e definir un plan de traballh de cara ath futur.
Eth plan d’ordenacion forestau realizat pera empresa Arantec a coma objectiu analizar era situacion actuau der ecosistema dera forest e ath madeish temps, obtíer un major profitament deth bòsc. Eth projècte que se trape a exposicion publica pretén analizar era persisténcia e estabilitat dera massa forestau mejançant era tecnica dera silvicultura. Aguesta tecnica permet eth cultiu des bòsqui entà obtíer ua produccion contunhada de bens e servicis coma eth profitament dera husta e tanben era conservacion deth mèdi ambient e dera natura, era proteccion des conques idrografiques e eth manteniment des zònes de peishius entath bestiar, entre d’auti.
Entà realizar aguest estudi tecnic, a estat de besonh un an e miei d’anàlisi de toti es factors que influissen ena vida deth bòsc coma, per exemple, eth clima, eth solei, era edat des arbres, era sua densitat, er hilat de camins, entre d’autes. Eth resultat ei un complèt trabalh de camp de totes es infraestructures e recursi naturaus des que se dispòse.
Era avaloracion des zònes de peishius, es fegures de proteccion, era massa forestau, es pistes e es camins dan coma resultat un estat saludable deth bòsc d’Artiga-Pomèro que tot e que non a ua capabilitat productora pera sua nautada es fòrtes arribentors que deficulten eth profitament dera husta, se tracte d’un bòsc san e pòc envielhitt (poblat principalment pes espècies d’auet e hai).
Athdelà, un nau plan d’ordenacion deth bòsc a permés méter en ordre eth sistèma de limits des proprietats e adaptar-les ath nau temps damb cartografia digitau e era sua relacion damb eth cadastre.

Endesa inicie es trabalhs entà retirar era linha aeriana electrica dera Ribèra deth Nere

ES TREBALHS DE DESMANTELAMENT S'AN HÈT VIA TERRESTRE E AERIANA

Vielha-. Era empresa ENDESA Energia inicièc a finals dera setmana passada es trabalhs de desmantelament dera linha aeriana electrica entre eth Cap dera Vila de Vielha e era Boca Nòrd deth túnel de Vielha complint atau eth compromís pres eth passat mes de junhsèga damb er ajuntament de Vielha e Mijaran.
Aguesta linha siguec construïda enes ans 50 e subministraue corrent electrica ar antic túnel, mes damb eth bastiment deth nau túnel Juan Carlos I, era alimentacion se realize actualment mejançant ua linha soterranha construïda peth camin municipau dera Ribèra deth Nere. Er alcalde de Vielha e Mijaran, Pau Perdices, sollicitèc ara companhia era sua retirada damb er objectiu de recuperar er entorn ambientau dera ribèra.
Pendent aguesti dies, desparièrs operaris an desvolopat ahèrs de desmantelament de part deth cablejat i des estrusctures metalliques en tot hèr a servir en quauque cas un elicoptèr. Es ahèrs de retirada deth materiau non an suposat, en cap cas, era interrupcion deth subministrament electric ath túnel.

D’aute biais, Perdices ei ara demora qu’era companhia Telefònica respone ara demana de soterrar era linha provisionau que se placèc de manèra urgenta a començaments des ans 90 e que crotzaue entara Ribèra deth Nere coma era zòna de Connangles ena Boca Sud deth túnel. Damb aguestes dues actuacions era recuperacion dera ribera serà absoluta.

Er Ajuntament de Vielha e Mijaran organize classes de iòga entara gent grana

Er ajuntament de Vielha e Mijaran a programat classes de iòga entara gent grana damb er objectiu de mantíer e melhorar eth sòn estat físic. Des deth passat 15 d’octobre e enquiath mes de mai deth 2010 s’an programat sessions de iòga enes que tanben se combinarà jòcs corporaus. Es sessions van adreçades ath collectiu dera gent grana e se programen dus còps per setmana, es deluns e dimèrcles tàs 18.00 ores enquia es 19.30 ores en equipament municipau deth Casau deth Jubilat. Segontes era regidora de Servicis Sociaus der Ajuntament, Rosa Mari Broto, es activitats van orientades a estimular es capabilitats cognitiues e fisiques dera gent grana melhorant era qualitat de vida. Era activitat e a un prètz de 25 èuros mesadèrs.
D'aute biais, eth Palai de Gèu acuelh session de gimnastica de manteniment entà majors de 60 ans. Aguesta activitat a un còst de 30 èuros, tot e qu'ei gratuïta entàs que son sòcis deth Palai de Gèu e deth Casau deth Jubilat Sant Miquèu de Vielha, auent un descompde deth 50% entàs que sonque son sòcis deth Casau.