Er Ajuntament de Vielha e Mijaran aufrís un servici gratuït de retirada de veïculs

Pendent er an 2009, er ajuntament tramitèc un totau de 70 expedients de retirada de veïculs

Vielha.- Un totau de 22 veïculs abandonadi ena via publica deth municipi de Vielha e Mijaran era majoria de proprietaris estrangèrs an estàt arremassadi aguesta setmana per un camion grua deth depòsit municipau. Er Ajuntament de Vielha e Mijaran aufrís as vesins deth municipi un servici gratuït de retirada de veïculs abandonadi ena via publica. Entà demanar aguest servici sonque cau contactar dirèctament damb ser servicis de vigilància municipau e desliurar es documents deth veïcul entà tramitar era baisha de manèra estandarizada.

En cas de Vielha e Mijaran son es Vigilants Municipaus es qu’activen eth protocòl des de que se detècte eth veïcul abandonat ena via publica enquià que se pòrte entath depòsit Municipau, plaçat en poligon industriau de Vielha. Eth protocòl qu’active er Ajuntament consistís en ua prumèra fasa de contacte damb es proprietaris, mès fòrça viatges ei fòrça dificil degut ath desconeishement deth domicili des madeishi. En cas de no contactar, er Ajuntament hè public a trauèrs deth Butletí Oficial de la Provincia que en un plaç d’un mes es veïculs an d’èster retiradi o desliuradi a un gestor autorizat entà obtíer eth certificat de destruccion e era baisha en registre dera Dirección General de Tráfico. Segontes er alcalde de Vielha e Mijaran, Pau Perdices, ena majoria de casi es proprietaris non complissen damb es sues obligacions e er Ajuntament a de procedir a tractar es veïculs coma residu municipal. Aguest hèt supause un problèma ja qu’er Ajuntament a d’assumir eth còst dera grua.
Pendent er an 2009, er Ajuntament de Vielha e Mijaran tramitèc 70 expedients de retirada de veïculs des quaus sonque 15 se resoléren damb renóncies volentàries per part des proprietaris. Anuaument eth consistòri comptabilize ua ventea d’abandonament de veïculs ena via publica. En aguest cas se procedís a tramitar un expedient sancionador.
Er abandon supause un problèma no sonque etic, senon qu’ocupe places de parcatge e pòt arribar a convertir-se en hònt de contaminacion entàs elements contaminanti coma es bateries, es filtres, es ròdes, e toti es liquids deth motor, inclodint es òlis e eth combustible.
Es punts neri en çò que tanh as zònes enes que se concentre eth major numerò d’abandonaments corresponen fonamentaument as parcatges publics autant des antigues casèrnes militares coma der antic CEIP Garona o ben ara gessuda de Vielha en direccion a Betren.