Er Ajuntament impolse melhores an Casau deth Jubilat de Vielha.

Vielha.- Er Ajuntament de Vielha e Mijaran a signat aué un acòrd de collaboracion damb era Associacion deth Casau deth Jubilat Sant Miquèu de Vielha mejançant eth quau melhorarà era organizacion dera entitat e es actiuetats que s’i aimen entà dauant gracies a ua subvencion anuau de 18.275,28€. Atau, era associacion curbirà es despenes de contractacion d’ua persona que se n’encuede des trabalhs pròpris deth servici de bar e era neteja deth locau.
Paralèllament, er Ajuntament se’n hè cargue des der an 2007, des despenes dera quòta patronau, quòta sociau e es despenes de gestoria. Enquiara, er unic ingrés dera associacion procedie des quòtes d’un centenat de sòcis que se destinaue sustot ara celebracion d’eveniments. En an 2007, er Ajuntament signèc un acòrd damb era entitat bancària “La Caixa” qu’a permés renauir eth centre damb eth bastiment d’ua aula multimèdia equipada damb ordinadors e destinar ua subvencion anuau de 4.000€ entà desvolopar actiuetats de léser coma iòga, gimnastica de manteniment e formacion en naues tecnologies. Entà enguan, er Ajuntament a previst invertir 23.530€, procedenti deth Fondo Estatal entara consolidacion dera bastissa e era adaptacion d’un ascensor exterior entath que se cercaràn naui hons de finançament. Segontes er alcalde de Vielha e Mijaran, Pau Perdices, er objectiu deth convèni ei dar supòrt economic as actiuetats sense anim de lucre que s’amien entà dauant des dera associacion entot afavorir er hilat associatiu deth municipi.