Eth teatre familhar principau atractiu dera programacion culturau der Ajuntament

Vielha.- Eth còsso de Cultura der Ajuntament de Vielha e Mijaran, Alex Moga, inaugurará deman dissabte eth cicle de teatre familhar organizat per ajuntament amassa damb es associacions Cine Fòrum e Aran Teatre e damb era collaboracion de Torisme Val d’Aran entàs 17,45 ores en cine de Vielha.Eth cicle “Cultura en Vielha” ei ua iniciatiua der Ajuntament damb er objectiu de promocionar eth teatre familhar damb un cicle d’actuacions que se haràn en cap-lòc aranés. Era prumèra actuacion aurà lòc deman dissabte entàs 18 ores damb era representacion dera òbra “Maps” dera companhia Nats-Nus ena que quate personatges atemporaus cargadi de bosses de viatge, s’arturen entà compartir damb er espectador viuénces, sensacions, sons e balhs. Era programacion contunharà eth pròplèu dia 11 de hereuèr damb eth comic Sinacio, un des melhors comics deth país que portarà entà Vielha era òbra “Solólogos”. Era sua afinitat damb eth mon Hellenic l’a portat a crear ua evolucion dera paraula Monolèg apellant ara sua umilitat e per açò, tot e èster conscient qu’ei un des tipes mès atractius deth planeta, s’estime mès titolar eth sòn espectacle damb eth nòm de Solologos. Es entrades entàs dus actes se pòden comprar ena Oficina de Torisme de Vielha.