Er Ajuntament e ADIGSA liuren cinc viuendes de loguèr en municipi

Abantes dera fin deth mes de hereuèr se poderien definir es bases d’accés ara naua promocion de 15 abitatges de loguèr damb opcion a compra ena zòna d’Eth Solan de Vielha

Vielha.- Eth dusau Tinent d’Alcalde e còsso de cultura, espòrts, joenessa e naues tecnologies, Alex Moga, e eth Director deth Servei Territorial d’ADIGSA en Lleida, Lluis Claverol, presidiren eth passat dimarts eth sorteg de cinc viuendes de proteccion oficiau de loguèr en Vielha. Des 30 sollicituts presentades, 18 sigueren admeses, 14 des quaus èren d’opcion a loguèr entà joeni e 4 entà majors de 35 ans. Es pisi formen part des promocions Vielha-20 e Eth Solan, un d’eri se trape plaçat en carrèr Sarraèra de Gausac e es auti ena Av. Maladeta de Vielha. Es viuendes corresponen a promocions dejà liurades anteriorament e qu’an anat quedant uedes .
Un còp sortejadi es cinc pisi, se creèc ua lista de demora ordenada entàs pròplèus viuendes que se vagen desocupan d’aguestes dues promocions. Segon Claverol, Adigsa trabalhe entara recuperacion de dus abitatges mès d’aguestes dues promocions que poderien quedar disponibles enes pròplèus mèsi. Eth Tinent d’Alcalde, Alex Moga, a anonciat qu’ara fin deth mes de hereuèr se poderie dispausar des condicions d’accés as 15 naui abitatges de loguèr a 10 ans e opcion a compra corresponenti ara promocion d’Eth Solan. En aguest sentit, eth director territoriau a comunicat que tath mès de hereuèr se poderie anonciar era convocatòria e ara fin deth mes de mai entregar es claus d’aguesta naua promocions. Se tracte dera prumèra operacion de loguèr damb opcion a compra que se harà en municipi de Vielha e Mijaran dubèrta a toti, e ena qu’ADIGSA auferirà condicions fòrça beneficioses entara compra des viuendes. Entà Moga, eth fluxe de gent que òpte as viuendes de loguèr entà joeni en municipi ei important, hèt que garantís er accés rapid ad aguest tipe d’abitatge.