Er Ajuntament de Vielha e Mijaran amplie era bibliitèca municipal damb ua sala de naues tecnologies

Vielha.- Er Ajuntament de Vielha e Mijaran ampliarà es servicis dera bibliotèca municipal damb era creacion d’ua sala contunha destinada a naues tecnologies. Eth nau servici se plaçarà ena planta baisha deth Palai de Gèu, en un locau uet ath cant dera bibliotèca, de titolaritat municipal, que permeterà hèr era ampliacion.

Eth Centre Tecnologic de Vielha (CTV), se plaçarà en locaus qu’er Ajuntament dispausarà ena bastissa deth Palai de Gèu e a pògui mètres dera bibliotèca municipal. Entad açò s’abilitaràn dus espacis de 65 m2 enes que s’installaràn ordenadors, pantalha, projector, escàner, mobiliari, entre d’auti. Eth nau centre serà dividit en tres espacis diferenciadi entath sòn usatge: un espaci entara formacion, un espaci entara connexion a internet de banda ampla equipat damb periferics e un tresau espaci comun, encara per definir.
Eth nau centre, damb un pressupòst de 60.000 èuros, complementarà un espaci d’estudi important e unic ena Val d’Aran e ajudarà en part a descongestionar eth servici de connexion a internet. Atau madeish, un des objectius ei acuélher damb mès comoditat eth punt TIC qu’actuaument s’aufrís de manèra parciau ena CiberAula deth Casau deth Jubilat Sant Miquèu de Vielha atau coma fomentar era aprenentatge damb era programacion de corsi de formacion ath long de tot er an.
Eth futur centre actuarà coma centre d’accés public a internet damb banda ampla, en tot hèr a servir connexion ADSL e sistèma Wifi. Eth còsso de naues tecnologies, cultura, espòrt e joenessa der Ajuntament de Vielha e Mijaran, Alex Moga, se mostrèc plan satisfèt pera iniciatiua que forme part deth projècte VIELHA DIGITAU. Aguest projècte inclodís desparières accions, entre eres, eth renauiment deth cine de Vielha entà convertir-lo en un espaci multifuncionau equipat damb tecnologia auançada (Era Audiovisuau) “Eth nau centre amassa damb Era Audiovisuau e eth Plan Director dera Societat deth Coneishement, a desvolopar enguan, plaçarà a Vielha en mapa tecnologic de Catalunya e ajudarà as ciutadans a familiarizar-se damb es naues tecnologies” afirme Moga.