Er ACA se compromet a finalizar les òbres d’Arròs abantes der ostiu

Vielha.- Er Alcalde de Vielha e Mijaran, Pau Perdices, s'amassèc a principis dera setmana passada damb eth delegat der ACA en Lleida, Josep Manel Pascual, peth seguiment des òbres dera naua estacion depuradora d’Arròs. Es òbres, parades des de hè mesi, se repreneràn entà poder-les finalizar abantes der ostiu. Aguest siguec eth compromís adoptat per Pascual ena amassada que se celebrèc en Lleida. Pascual se comprometec a auançar es òbres entà canalizar e depurar es aigües residuaus des nuclèus d’Arròs e Pònt d’Arròs damb eth bastiment d’ua planta damb capabilitat entà 775 abitants (era poblacion actuau d’Arròs ei de 107 abitants) que supausarie un cabau diari de 75 m3. Er alcalde de Vielha e Mijaran, Pau Perdices, profitarà era visita deth conselhèr de Miei ambient e Abitatge dera Generalitat, Francesc Baltasar, eth pròplèu 16 d’en abriu entà expausar es besonhs deth territòri.