S’inicien es òbres de remodelament deth Passeg dera Libertat de Vielha

Vielha.- Es servicis municipaus de l’Ajuntament de Vielha e Mijaran retirèren entre deluns e dimarts eth mobiliari urban deth Passeg dera Libertat de Vielha per inici des òbres de remodelament que supausaràn un càmbi plan important ena fisonomia d’aguest punt centric dera vila damb ua inversion de 860.000 èuros. Se calcule qu'eth nau passeg poderie èster prest a principis d’ agost. En aguest sentit, er alcalde de Vielha e Mijaran, Pau Perdices, se mòstre satisfèt pera comprension des vesins afectadi pes òbres pendent eth temps previst. En tot complir eth calendari establit, era reforma deth Passeg dera Libertat de Vielha prepause er acondicionament deth passeg coma zòna entà pedanhs damb ua circulacion rodada controtlada en un unic sentit e sense era possibilitat de parcatge ara excepcion hèta dera zòna de carga e descarga.
Er envielhiment deth Passeg e era manca d’accions auie maumetut eth caractèr comerciau d’aguesta via principau. Ara, damb eth projècte de melhora se preten revitalizar er èish comerciau de Vielha. Un dusau projècte qu'eth consistòri contemple en aguesta zòna dera vila ei era union dera plaça Mossen Joan Casseny damb era Avenguda Castièro entà dar ua màger esponjositat e flux ath centre dera vila.