L'alcalde lliure els premis als guanyadors de la sisena etapa de la Pirena

Vielha.- L’alcalde de Vielha e Mijaran, Pau Perdices, va ser l’encarregat juntament amb altres responsables de lliurar els premis als guanyadors de la sisena etapa de la Pirena a Beret que es va celebrar ahir dijous a l’Aran. Un cop finalitzada la proba diürna de 44 quilòmetres, els guanyadors van anar rebent un a un els guardons pels mèrits aconseguits. A l’acte també hi van assistir el responsable d’esports del Conselh Generau d’Aran i entrenador nacional d’esquí alpí, Rafa Sanmartí, el president del consorci de turisme de les Vall d’Àneu, Carles Cortina, el regidor de l’ajuntament de Naut Aran, Josep Maria Moga i representants de l’estació d’esquí de Baqueira Beret.

Vielha e Mijaran s’afrairarà damb era vila de Calafell

Vielha.- Eth plen der Ajuntament de Vielha e Mijaran celebrat eth dia 27 de gèr, aprovèc damb es vòts a favor de CDA e PPA e damb era abstencion d’UA-PSC, iniciar er expedient d’afrairament damb er ajuntament de Calafell. Pròplèument se constituirà ua comission que serà presidida per alcalde e formada per representants de toti es grops municipaus e vesins de Vielha. Era volentat des dues viles ei establir e consolidar eth coneishemet mutu, era cooperacion e eth escambi d’experiéncies coma viles toristiques, de progrés e de cultura.
Er Ajuntament de Vielha e Mijaran tanben ei afrairada damb es viles franceses de Saint Gaudens e Saint Girons, tot e que segontes er alcalde, Pau Perdices, ei mès complicat desvolopar accions comunes de col.laboracion. Er ajuntament de Calafell se mostrèc dispausat des d’un inici a mantíer iniciatiues complementàries en camp esportiu e de léser, coma estances esportiues, de vela o esquí. Entar alcalde, era opcion ei factibla auent en compde er interès des dus consistòris entà amià’c entà dauant. Calafell talament coma Vielha ei ua vila toristica e pòt èster complementària e un exemple en ahèrs coma erA aplicacion de normatiues, eth procés d’informatizacion o er hèt d’amassar esfòrci entà arténher un madeish objectiu.

Er Ajuntament de Vielha e Mijaran a convocat un an mès as vesins deth municipi entà participar ena Hèsta de Magràs

Vielha.- Er Ajuntament de Vielha e Mijaran a convocat un an mès as vesins deth municipi entà participar ena Hèsta de Magràs. Eth pròplèu dia 12 de hereuèr lèu 500 alumnes deth CEIP Garona de Vielha, d’entre 3 e 12 ans, participaràn ena tradicionau desfilada peth centre dera vila. Entàs 10 deth maitin gesserà eth passavila des installacions der estudi en Betren, entà baishar pera Av. Pas d’Arró e Passeg dera Libertat, en tot barrar ath transit aguesti carrèrs mentres dure er acte. Fin finau, es alumnes tornaràn entath centre entà acabar era hèsta damb era tradicionau crema deth Magràs. Diuendres 12 de hereuèr entàs 17,30 ores: Magràs sus Gèu entà toti. Es que vien disfrassats patinen de franc, vrespalh damb còca e chicolate.
Entàs adults, eth dissabte dia 13 de hereuer entàs 22,00 ores s’a organizat un sopar en otèl Tuca de Betren damb un prètz de 33 èuros, e ara seguida i aurà un balh ena discotèca der Otèl a cargue de DJ Fabian. Es tiquets tath sopar se pòden comprar ena Oficina de Torisme de Vielha enquiath dia 10 de hereuèr, auent en compde qu’es places son limitades e que non se veneràn tiquets eth madeish dia. Cau remercar qu’eth balh, qu’ei gratuït; ei dubèrt a toti es vesin e que non ei obligatòri anar disfrassat. Er an passat era convocatòria amassèc a mès de 150 participants. Er Ajuntament de Vielha e Mijaran trabalhe entà recuperar antigues tradicions en municipi coma era celebracion deth Barbacans qu’a constituït pendent segles un des simbèus dera hèsta de magràs mès importants ena Val d’Aran

Er Ajuntament de Vielha e Mijaran organize ua gala benefica entà arremassar hons entà Haití

Vielha.- Er Ajuntament de Vielha e Mijaran a previst organizar eth pròplèu dimenge dia 31 de gèr a compdar des 19 ores, ua gala benefica de patinatge sus gèu entà arremassar hons entà Haití. Lèu 80 patinaires d’entre 3 e 16 ans auferiràn ath public assistent desparières actuacions ja sigue a nivèu individuau coma collectiu. Eth Club d’Espòrts de Gèu dera Val d’Aran amassa damb era Escòla de Patinatge deth Palai de Gèu son es responsables dera organizacion d’aguesta gala qu’aurà un prètz d’entrada entàs adults de 7€ e entara mainadèra de 3€. Damb aguesta iniciatiua, se vò ajudar as afectadi peth desastre de Haití. Non ei eth prumèr viatge qu’eth Palai collabòre en accions solidàries ja qu’anuaument organize ua gala benefica entà ajudar ath pòble saharauí. Segontes era còsso d’Accion Sociau e Ciutadania, Rosa Mari Broto, era iniciatiua solidària a coma objectiu canalizar era solidaritat d’Aran e dar supòrt a projèctes de postemergéncia e de reconstruccion en aguest país.

Er Ajuntament de Vielha e Mijaran celebre era Hèsta de Carnaval

Sopar e balh popular

Eth dissabte dia 13 de hereuèr tàs 22,00 or. en Otèl Tuca de Betren
Prètz: 33€ eth sopar
Balh gratuït ena discoteca der otèl damb DJ Fabian
Poderatz crompar es tiquets ena Oficina de Torisme enquiath dia 10 de hereuèr
Places limitades
Non se veneràn tiquets eth madeish dia
Non ei obligatòri anar disfrassat

Un estudi mòstre que Vielha se trape en ua situacion auançada enes TIC respècte a Catalunya

Vielha.- Pendent tres mèsi, er Ajuntament de Vielha e Mijaran a trauèrs der Airau de Naues Tecnologies a realizat un estudi sus quina ei era implantacion des TIC (Tecnologies dera Informacion e Comunicacion) enes empreses deth municipi. Entà desvolopar aguest estudi s’a enquestat un total de 66 des 710 empreses deth municipi detectant es deficiéncies e besonhs en cadua d’eres.
Es factors d’estudi s’an dividit en doble sentit, per un costat, s’an analizat es empreses en foncion deth tipe d’actiuetat comerciau e, per un aute, s’a estudiat eth grad d’implantacion des TIC enes empreses (ordinadors, internet, banda ampla, plana web, corrèu electronic, hilat d’airau local, connexion a telefonia mobila)
En çò que tanh as sectors economics, eth 23% des empreses en Vielha correspon a comèrci, 23% a ostalaria e restauracion, 29% a constructores e associades, 21% a servicis, 11% immobiliàries e 2% d’autes. Eth 62% des empreses son microempreses e es que an mès de 25 trabalhadors se dediquen principaument ara construccion o ben son cadenes empresariaus.
Des conclusions se’n trè qu’eth sector servicis ei eth sector en eth qu’eth percentatge d’ordinadors e connexion a internet ei menor, tot e qu’eth percentatge de corrèu electronic ei elevat e hèn a servir eth corrèu personau ena majoria des casi, D’aute biais, eth sector dera ostalaria ei eth que mès preséncia a en internet a trauèrs des planes web atau coma eth sector immobiliari. Ara contra, bars e restaurants non arriben as minims,
Se comparam es donades, qu’apòrte er INE de gèr de 2009, Vielha e Mijaran se trape en situacion auançada damb era rèsta de Catalunya ena implantacion des TIC ja qu’es empreses que dispausen d’ordinadors, corrèu electronic e plana web son en quauqui casi superiores ath 20% en comparacion a Catalunya.
Er estudi a estat realizat pera licenciada en economiques Nuria Medan qu’a estat contractada per Ajuntament de Vielha e Mijaran en un plan ocupacionau pendent tres mèsi e que forme part deth projècte Alt Pirineu Digital.

ESTUDI SOCIECONÒMIC VIELHA-MIJARAN

Eth Govèrn se compromet a realizar era varianta de Vielha en an 2012

Vielha.- Er Alcalde de VIelha e Mijaran, Pau Perdices, s’a amassat damb eth Director Generau de Carretères, Jordi Follia, entà tractar es principaus propòstes e exigéncies sectoriaus en matèria de mobilitat en municipi, entre eres, era varianta transversau de Vielha ena zòna deth Solan.
En aguest sentit, Follia a informat ar alcalde dera finalizacion der estudi d’impacte ambientau e constructiu dera futura infraestructura. Follia se mostrèc comprensiu en besonh de crear era varianta C-28 de Vielha damb connexion a Escunhau auent en compde que se tracte d’ua prioritat en çò que tanh ara mobilitat, qu’evitarie er elevat transit actuau peth centre dera poblacion. Era creacion dera varianta, prevista tath 2012, permeterie ath viatge, establir era transformacion des trauèsses urbanes en passegi, un còp finalizada era sua desafeccion coma carretères. Segons er alcalde de Vielha e Mijaran agues hèt supausarie auançar en eth projècte de convertir eth centre istoric de Vielha en ua zòna desliurada de veïculs. En çò que tanh ara execucion des òbres s’establís un plàç maxim de 2 ans.
D’aute biais, eth Director Generau de Carretères assumic eth compromís d’intervíer ath dauant deth Ministerio de Fomento entara melhora immediata deth crotze sus er arriu Garona ena N230 ja que se tracte d’un punt conflictiu. Sus era C-28 entre Salardu e Baquèira, que se trape en fasa de licitacion, Follia non dèc garanties sus sera finalizacion des òbres de melhora abantes der an 2011. En aguest sentit, er alcalde considère qu’ei ua prioritat entath consistòri auent en compde es afectacions sociaus, economiques e toristiques que a sus Vielha.

Perdices a presentat es projèctes de mobilitat que se contemplen en un futur, entre es que i remèrque era creacion d’un pas entàs passants sus er arriu Garona, ara nautada der otèl Sol Vielha e que permeterie era connexion deth centre de Vielha damb era zòna d’Eth Solan
En aguest sentit a demanat eth cofinançament damb eth departament entà executar aguesta òbra. Atau madeish sollicite que se mantengue eth servici de taxi ara demana ja que se tracte d’un bon servici en çò que hè ara mobilitat e demane qu’eth transpòrt public d’autobusi se hèsque de manèra integrada damb era possibilitat d’abonaments atau coma s’auferís actuaument en airau metropolitan de Barcelona. Segontes er alcalde eth prètz deth viatge d’anada e tornada de Vielha a Barcelona ei excesiu ja que supère es 60 èuros e cau melhorar era aufèrta de prètzi enes desplaçaments coma Vielha-Lleida o Vielha – Barcelona.

Credicat presente en Vielha eth projècte de produccion d'arnica en Pirenèu

Eth Centre de Desvolupament Rurau Integrat en Catalunya e era entitat Obra Social Caja de Madrid, presenten eth pròplèu dia 19 de gèr en Vielha eth projècte "Uso sin abuso", entàs 19,00 ores en Conselh Generau. Aguest projècte vò contribuïr ath desvolupament des zònes de montanha e ara conservacion des sòns recorsi vegetaus locaus, determinant es punts clau entà iniciar ua produccion sostenibla d'arnica (Arnica montana) ena zòna d'influéncia socioeconomica d'Aigüestortes. Entara sua realizacion s'a compdat damb eth supòrt tecnic de l'Àrea de Productes Secundaris del Bosc e deth Centre Tecnològic Forestal de Catalunya e dera Unitat de Farmacologia e Farmacognòsia dera Facultat de Farmàcia dera Universitat de Barcelona.Es resultats obtiengudi seràn presentadi per Roser Melero, tecnica deth Centre Tecnològic Forestal de Catalunya e se compdarà tanben damb era particpacion d'Ana Sirvent de Taüll Orgànics, que expausarà era sua experiéncia coma productora d'arnica ena Alta Ribagorça.

Er alcalde Pau Perdices demane ath Conselh promocionar eth territòri en aeropòrt d’Alguaire

Vielha.- Er Alcalde de Vielha e Mijaran, Pau Perdices, sollicitarà ath Síndic d’Aran, Francés X. Boya, e ath Conselhèr de Torisme deth Conselh Generau d’Aran, Juan Antonio Serrano, realizar ua campanha de promocion toristica deth territòri en aeropòrt d’Alguaire, auent en compde era sua pròplèu inauguracion eth dia 17 de gèr.Entà Perdices ei plan important auer en compde aguestes infraestructures entà dar valor a Aran coma destinacion toristica, ja sigue en aeropòrts internacionals deth sud de França, coma eth de París, Tolouse e Tarbes o en aeropòrts mès petiti coma eth d’Alguaire o eth de Huesca-Pirineos. “Ei ua oportunitat de promocion que cau auer en compde e que permeterà ajudar a promocionar toristicament eth nòste territòri”, higec er Alcalde

Er Alcalde de Vielha reitère mès seguretat ena N-230

Er Ajuntament de Vielha e Mijaran informe sus un pas intermitent ena N-230 en punt quilometric 162, ara nautada deth pòble de Casau, per un incident ena via que a obligat a talhar en un sentit era circulacion dera madeisha. Er incident s’a produsit entàs 13,30 ores quan un camion a perdut era caisha e a vessat òli idraulic ena cauçada. Se prevé que se restablisque eth transit çò mès lèu possible.
Er Alcalde de Vielha e Mijaran, Pau Perdices, reitère un còp mès er incompliment negligent per part deth Ministerio de Fomento dera actuacion d’urgéncia dera ampliacion dera cauçada e mides de seguretat en aguest tram des dera Boca Nòrd deth Tunèl de Vielha, pendent d’apraiar des der an 2008.Er inicident d’aué se hig ara longa lista de talhs contunhadi en aguesta via. Cau rebrembar qu’en plaç d’un an i a auut dus accidents mortaus en aguest tram e esbaussaments qu’an afectat er estat dera via. Toti aguesti incidents perjudiquen grèument era imatge toristica deth municipi.

Er Ajuntament de Vielha e Mijaran incorpòre ua camion grua ath sòn parc mobil

Era brigada municipau incorpòre ath parc mobil un camion grua damb cistalha

Vielha.- Er Ajuntament de Vielha e Mijaran a incorporat un nau veïcul ath parc mobil que permeterà hèr intervencions en nautada damb major rapidesa e seguretat. Damb era intencion de renauir progressiuament eth parc mobil dera brigada municipau, er Ajuntament a aquerit un veïcul tipe camion damb grua e cistalha de dues places que permeterà as operaris dera brigada era realizacion des sòns ahèrs abituaus de manteniment damb mès seguretat e rapidesa.
Eth veïcul dispause d’ua grua cistalha adaptada entà portar a dus operaris e dotada des sistèmes de seguretat omologadi. Era sua utilitat ei principaument entàs servicis electrics coma eth manteniment der enlumenat public ja qu’eth braç elevador a ua nautada d’11 mètres. Recentament s’a hèt a servir entà trèir era decoracion de nadau e entara poda des arbres deth municipi. Damb era naua aquisicion, eth parc mobil dera brigada municipau compde damb ua dotacion de nau veïculs: un camion 4X4 mixte, ua machina carregadora, un veïcul entà tirar sau, dues camionetes, dues forgonetes, un veïcul 4X4 e un veïcul utilitari. Aguest nau camion a auut un còst de 56.000 €.

Er Ajuntament de Vielha e Mijaran meterà en marcha administracion dubèrta entar an 2010

VIELHA E MIJARAN SERÀ ETH PRUMÈR MUNICIPI DE 5000 ABITANTS DE DISPAUSAR D’ADMINISTRACION DUBÈRTA EN CATALUNYA

Vielha.- Er Ajuntament de Vielha e Mijaran a adjudicat per valor de 240.000 € er ambiciós projècte de modernizacion e adequacion ara Lei 11/2007 qu’a de perméter ath ciutadan er accés electronic as servicis public. Era administracion dubèrta permeterà simplificar es procediments, melhorar era interoperabilitat damb d’autes administracions e era implantacion d’un sistèma multicanal entara melhora dera gestion e atencion ath ciutadan. Era empresa adjudicatària d’amià’c entà dauant ei eth Grupo Meana e se calcule que serà de besonh un an entara implantacion deth madeish, serà alavetz en 2011 quan toti es ciutadans de Vielha e Mijaran poderàn utilizar aguest servici.
Segontes eth dusau Tinent d’Alcalde e Còsso de Naues Tecnologies, Alex Moga, méter en foncionament era Administracion Dubèrta esvitarà desplaçaments, permeterà era immediatesa des operacions ath delà de mès eficàcia e major productivitat laborau. Entara pròplèu setmana aurà lòc era prumèra amassada deth comitè de seguiment format pes representants dera empresa e der Ajuntament entà coordinar es bases des trabalhs. Cau díder qu’er Ajuntament de Vielha e Mijaran ei eth prumèr municipi de mès de 5.000 abitants que s’adaptarà ara naua lei.
Quauques des foncions qu’era implantacion deth nau sistèma d’atencion e gestion multicanal, pemeterà as ciutadans, empreses, entitats e d’auti collectius serà eth de dispausar de mecanismes d’autentificacion e signatura electronica; iniciar sollicituts de tramits administratius; accedir ara informacion privada deth ciutadan; consultar en quinsevolh moment er estat des tramits iniciadi telematica o presencialment, o ben recéber avisi per e-mail o SMS sus er estat des madeishi, entre d’auti. Eth projècte a ua còst de 240.000 €, des quaus 117.460 € seràn finançats a trauèrs d’ua subvencion deth Ministerio de la Presidencia, 19.500€ dera AOC (Administració Oberta de Catalunya) e 96.000 € d’aportacions des hons pròpris der Ajuntament.

Antic Vielha barre era sua XVau. edicion damb 2.500 visitants

Es organizadors avaloren positiuament es resultats qu’an estat leugèrament superiors as der an passat

Vielha.- Era fira d’antiquitats Antic Vielha, organizada per Ajuntament de Vielha e Mijaran, a barrat era sua XVau. edicion superant es expectatiues des organizadors damb un totau de 2.500 visitants. Deth 28 de deseme ath 4 de gèr, era Sala Polivalenta de Vielha a acuelhut de nau aguesta importanta cita deth tot consolidada. Segontes eth representant d’Antic Vielha, Miquel Colin, l’avaloració dera fira a estat deth tot positiua ar auer superat leugèrament es resultats artenhudi er an anterior, e mès auent en compde qu’ei un an dificil economicament. Enguan, era edicion a compdat damb 13 expositors procedenti dera Peninsola, França e Alemanha e qu’an mostrat ath visitant desparières pèces d’antiquaris e brocantèrs. Era bona acuelhuda hè a pensar en ua naua edicion entad aguest an 2010.

Cavaucada de Reis

Cavaucada de Reis.- Auè dia 5 de gèr, arribaràn es Reis d’Orient en Municipi de Vielha e Mijaran. Entàs 17.,00 ores anaràn tath pòble de Gausac, a on era EMD auferirà a toti es que vajatz a demorar as Reis ua chicolatada e Vin Caud.Entàs 18.15 ores gesserà era cavaucada des de Gausac entara Plaça dera Glèisa a on les demorarà er Alcalde e era Corporacion Municipau. Dempús des deth balcon der Ajuntament es Reis mos liejeràn eth sòn descurs.Mentres demoram era arribada des Reis, er Ajuntament auferirà enes cubèrt còca e chicolate caud entà toti es assistenti.A compdar des 19.15 ores es Reis d’Orient arribaràn en Cine de Vielha entà que tota era mainadèra que volgue, pogue anar a veder-les e parlar damb eri.