Ei un espaci dubèrt entà toti, un lòc de socializacion e punt de trobada a on confluís ua aufèrta culturau diuèrsa. Era bibliotèca ei plaçada ena planta baisha deth Palai de Gèu. Er accès ei dirècte pera entrada principau d'aguest complèxe esportiu e de léser.

Referéncia: diccionaris, enciclopèdies, anuaris, òbres de consulta e d'auti libres que, peth sòn interès, era bibliotèca considère excludits de prèst.
Hons generau: documents en tot tipe de supòrt sus toti es camps deth coneishement uman.
Fonotèca: en aguesta seccion se pòt trobar tota sòrta de musica: musica tradicionau, jazz, blues, ròck, musica classica, naui lenguatges musicaus, bandes sonores, musica infantila, etc.
Seccion infantila: era seccion infantila a ua variada aufèrta de literatura entara mainadèra, pellicules, CD, libres de coneishements sus matèries diuèrses e òbres de referéncia entà mainatges enquias 12 ans. En aguesta seccion tanben i a eth Cornèr des Pairs, un hons especializat ath torn deth mon deth mainatjon.
Videotèca: a on se pòt trobar vidèos e DVD, de pellicules e documentaus.
Colleccion Locau: ei compausada pera documentacion que hè referéncia ara Val d'Aran. En aguesta seccion tanben i a era Colleccion Occitana, a on s'arremasse tota era informacion referida ara lengua e cultura occitanes.
Emerotèca: premsa diària e publicacions periodiques. Punt d'informacion "Er espaci dera Union Europèa".

Informacion:
Era bibliotèca ei un centre locau d'informacion a on eth personau orientarà as usatgèrs sus coma foncione era bibliotèca e es servicis qu'er usatgèr pòt auer ara man.
Consulta:
Tota persona pòt accedir liurament ara bibliotèca e consultar eth sòn catalòg e tanben eth catalòg collectiu deth Sistema de Lectura Pública de Catalunya.
Carnet de prèst:
Entà hèr-se eth carnet de prèst cau dar es dades personaus e presentar ath personau dera bibliotèca eth DNI o un aute document acreditatiu.
Qui se pòt hèr eth carnet?
• Es residents en Vielha e ena Val d'Aran.
• Es que demoren temporaument en Vielha e ena Val d'Aran, per motius de trabalh o d'estudis. En aguest cas, tanben cau dar era adreça permanenta e eth contracte de trabalh o matricula deth centre a on estúdien.
• Es persones que passen ua temporada de vacances o qu'agen dusau residéncia tanben pòden obtier un carnet provisionau mejançant un depòsit de sòs qu'era bibliotèca retornarà ar usatgèr un còp qu'aguest age tornat es documents en prèst.
Eth carnet ei valable mentre er usatgèr demore en Vielha o ena Val d'Aran.
Servici de prèst e prèst interbibliotecari:
Aguest servici permet emportar-se pendent quauqui dies libres, disques compactes, revistes e vidèos.
Eth periòde de prèst ei de 15 dies tàs libres e ua setmana entàs vidèos e CD. Es revistes se pòden deishar ua setmana, exceptades es que siguen deth mes en cors.
Entà utilizar aguest servici, cau auer eth carnet de prèst dera Bibliotèca. S'era Bibliotèca non auesse un document determinat e aguest se trobèsse en ua auta bibliotèca, se poderie demanar per prèst interbibliotecari en d'autes bibliotèques deth Sistema de Lectura Pública de Catalunya.
Era bibliotèca tanben proporcione un servici de prèst especiau entà entitats: escòles, centres culturaus, residéncies assistenciaus, associacions...
Connexion a internet:
Era bibliotèca aufrís accès a internet, er usatgèr a un temps maxim d'ua ora diària. Era prumèra mieja ora ei gratuïta e ena auta s'aplique ua tarifa proporcionau ath temps de consulta.
Fotocopiadora d'autoservici.
Activitats:
- Formacion d'usatgèrs.
- Visites didactiques concertades.
- Activitats d'animacion ara lectura (recitaus, ores deth conde, talhèrs, presentacions de libres, exposicions). Setmana der Aniversari dera Bibliotèca, hèsta de Sant Jòrdi, Setmana deth Libre Infantil e Juvenil.
- Collaboracion mesadèra dera bibliotèca damb eth programa de ràdio Meddia Aranés, de Catalunya Ràdio en Aran e damb es revistes La Borrufa e Tot Aran, a on eth personau dera bibliotèca recomane libres.