Er Ajuntament estudie crear ua minicentrau idroelectrica en Vielha entà generar energia renovabla

Vielha.- Er Ajuntament de Vielha e Mijaran trabalhe en un projècte d’energia renovabla en municipi, centrat ena construccion d’ua minicentrau idroelectrica plaçada en Cap dera Vila de Vielha.

Er ajuntament vò profitar era concession vigenta dera CHE d’ua antiga asserradora plaçada apròp dera pista forestau dera Ribèra deth Nere, en Cap dera Vila, entà remodelar es installacions e atau generar electricitat entath nuclèu de Vielha.

Segontes era empresa Arantec Enginheria, responsabla deth projècte, era minicentrau generarie ua emergia neta renovabla estimada en 1,8 Gwh/an que equivau a ua produccion annau de 680 tònes de CO2 o çò qu’ei çò de madeish, eth consum annau d’electricitat de 1200 abitants. Actuaument eth quilovat produsit se cotize a 7,8 cèntims eth Kw/ora.

Eth projècte requerís ua inversion aproximada d’un milion d’èuros entara installacion d’un transformador e ua turbina ath laguens dera bastissa actuau e eth bastiment d’ua canerada de 200 mètres de longada que conduïrà era aigua des de pògui mètres peth dessús dera renclusa enquiara turbina. En çò que tanh ara durada des òbres se calcule que poderien èster prèstes en un an, des dera obtencion des permisi

Segontes es redactors der estudi de viabilitat, eth projècte dera minicentrau ei ua apòsta entàs energies renovables e era repercusion mieiambientau serie minima ath non derivar substanciaument era aigua dera lhera der arriu e ath respectar eth caudal minim ecologic que garantís ua corrècta dinamica fluviau. Ath delà, eth sistèma de captacion se projectarà entà que non afècte ath paissatge

Tanhent ara inversion, er ajuntament ei titular dera finca pera que se projècte era canerada e tanben dera bastissa dera antiga asserradora, açò compòrte qu’era rendibilitat dera inversion demorada sigue deth 8,18 %. Atau madeish, er alcalde de Vielha e Mijaran, Pau Perdices, a sollicitat ajuda ara Deputacion de Lleida entath finançament deth projècte.