Notícies Veir istoric
Era Pedals de Foc Non Stop celèbre era sua 16au edicion aguest dissabte 2 de junhsèga
Era pròva ciclista de BTT damb gessuda e arribada en Vielha, compdarà damb lèu 750 participaires, en tot generar ua repercusion economica entà Vielha e Mijaran ath torn des 300.000€
Aguest pròplèu dissabte 2 de junhsèga, era pròva ciclista de BTT, Pedals de Foc Non Stop, celebrarà era sua 16au edicion, damb eth tradicionau recorregut qu’a Vielha coma punt de gessuda e d’arribada. Aguesta competicion enguan cèrque retornar as sòns origens, en tot deishar d’èster Campionat d’Euròpa Ultra Marathon MTB, e recuperar er esperit mès popular.
Enguan se manten eth perfil abituau de 213 kms e 6200 mètres de desnivèu positiu, en tot crotzar bona part dera Val d’Aran e es comarques vesies (Alta Ribagorça, Pallars Sobirà e Pallars Jussà). Ua des principaus nauetats d’aguesta 16au edicion ei, qu’ath delà dera modalitat individuau, tanben hi aurà ua modalitat per parelhes (masculines, femenines e mixtes), era quau a estat fòrça ben recebuda e qu’a artenhut fòrça demanda.
Aguesta competicion ei ja un classic enes eveniments esportius der ostiu en Vielha e Mijaran. Era prumèra edicion se disputèc en 2006, e cada an a aumentat era donada de participaires. Sonque calèc lamentar era non celebracion de 2020, a conseqüéncia dera pandémia.
Ei ua des pròves que mès repercusion economica compòrte entath sector toristic de Vielha e Mijaran, pr’amor que se demore lèu 2000 persones pendent tota era dimenjada, en tot compdar as participaires e acompanhants. Era bona situacion respècte ara pandémia, gràcies as campanhes de vacunacion, permet qu’ena edicion d’enguan, i pogue auer ua nauta afluéncia de gent en municipi pendent era sua celebracion.
Eth programa dera competicion ei eth següent: Diuendres 1 de junhsèga, des 16 as 21 ores s’amiarà a tèrme era arremassada de dorsaus en parcatge des antigues casèrnes militares. Eth briefing non serà presenciau, senon que s’enviarà un vidèo as participaires. Dissabte, entàs 04:30, aurà lòc era gessuda en Carrèr Querimònia, e ath ser se realizarà eth liurament de prèmis a mesura que se complèten es pòdis des desparières categories.
“Èm contenti de poder tornar a recéber era Pedals de Foc Non Stop en nòste municipi. Ei ua des granes competicions esportives qu’auem en Vielha e Mijaran, e que supausen ua grana repercusion economica entà tot eth sector toristic locau”, comente eth baile de Vielha e Mijaran, Juan Antonio Serrano. E ahig que “damb era participacion de corredors de diuèrsi païsi, era Pedals de Foc Non Stop met a Vielha e Mijaran en mapa internacionau des competicions esportives”.
Lieger mès
28/06/2022
Nòta informatiua sus eth Convèni de delegacion de competéncies de gestion forestau en favor deth Conselh Generau d’Aran, per part des Ajuntaments e Entitats Menors Descentralizades dera Val d’Aran
Lieger mès
23/06/2022
Eth plen der Ajuntament de Vielha e Mijaran apròve era 4au modificacion de credit deth pressupòst d’enguan, damb eth que se poirà invertir en importantes òbres en municipi
Lieger mès
16/06/2022
Vielha inície aguesta setmana era sason de competicions esportiues d’aguest ostiu damb era arribada dera 4au etapa e era gessuda dera 5au etapa dera Transpyr Coast to Coast 2022
Lieger mès
