Era Escòla Mairau “Era Cunhèra” de Vielha implemente era agenda digitau coma estrument entà milhorar era comunicacion dirècta diària damb es familhes
Eth centre escolar a metut en foncionament era app TokApp School damb era que s’informe de tot çò que s’amie a tèrme per part der alumnat, de manèra qu’es pairs/mairs pòden auer ua informacion mès detalhada e precisa directament en telefo
Era Escòla Mairau “Era Cunhèra” de Vielha adapte era comunicacion qu’abituauments establís damb es familhes deth sòn alumnat, damb era implementacion dera agenda digitau, gràcies ara app TokApp School.
Aguesta airina permet qu’eth centre escolar pogue informar de forma detalhada e mès precisa de tot çò que se realize ena escòla, de manèra qu’es pairs/mairs receben directament en telefonet quina ei era activitat diària deth sòn hilh/a.
En aguest sens, s’informe de tot çò qu’a a veir damb es dinars, era sòn, es deposicions, atau coma d’auta informacion que des deth centre escolar poguen creir que sigue interessant d’informar as familhes (activitats a realizar, campanhes de vacunacion, materiau a portar, eca).
D’aguesta manèra, eth centre escolar substitutís era agenda en papèr pera introduccion dera naua tecnologia, en tot adaptar-se as naui tempsi, e generar un estauvi economic e sostenible.
“Des der Ajuntament de Vielha e Mijaran credem qu’ei plan important milhorar era comunicacion dirècta entre era escòla mairau e es familhes damb es naues tecnologies, per açò era naua app TokApp School permet auer un contacte diari de tot çò que se realize en centre”, comente eth 2au tinent d’alcalde e còsso d’ensenhament de Vielha e Mijaran, Alberto López. E ahig que “seguim milhorant es servicis que balham des dera escòla mairau, enguan damb mès formacion per part deth professorat e tanben damb era implantacion des naues tecnologies”.
29/11/2024
