Notícies Veir istoric
Er Ajuntament de Vielha e Mijaran amplie eth pati dera Escòla Garona en mès de 400 m²
Era accion, damb ua inversion de mès de 44.000 èuros, recupère ua zòna en desús e la transforme en un nau espaci de jòc, convivéncia e aprendissatge entar alumnat
Er Ajuntament de Vielha e Mijaran se trape en tot finalizar es òbres dera dusau fasa d’adeqüacion e milhora deth pati dera Escòla Garona, ua accion que permet ampliar er espaci exterior deth centre en mès de 400 m² e recuperar ua zòna qu’enquia ara se trobaue en desús.
Eth projècte compde damb ua inversion de mès de 44.000 èuros e a permetut transformar aguest espaci en ua naua zòna utila entath dia a dia dera escòla, en tot incorporar naui paviments, barraments renauidi, pòrtes entà sectorizar es espacis, ua hònt d’aigua potabla e ua zòna ajardinada damb arbes frutèrs.
Eth tinent d’alcalde e còsso d’Educacion, Alberto López López, a destacat que “damb aguesta accion ampliam eth pati dera Escòla Garona en mès de 400 m², en tot recuperar ua zòna qu’enquia ara ère en desús e en tot convertir-la en un nau espaci entàs mainatges e mainades dera escòla”.
López a soslinhat qu’aguesta òbra “hè part dera dusau fasa d’adeqüacion e milhora deth pati dera Escòla Garona, damb ua inversion de mès de 44.000 èuros, e arrespon a ua idèa fòrça clara: seguir en tot milhorar es equipaments educatius deth municipi damb accions concrètes, utiles e pensades entà auer un impacte reau en dia a dia deth centre”.
Era accion tanben a ua especiau vinculacion damb eth projècte educatiu dera Escòla Garona coma Escòla Verda. En aguest sens, eth nau espaci ajardinat damb arbes frutèrs non sonque milhore era qualitat deth pati, senon qu’apòrte ua valor pedagogica ahijuda, en tot perméter qu’er alumnat pogue observar es cicles dera natura, apréner des deth contacte damb er entorn e refortilhar abituds restacades damb eth suenh deth miei ambient.
“Damb aguest ampliament, era Escòla Garona guanhe un pati mès ample, mès segur e damb mès possibilitats entath dia a dia der alumnat. Mès, ath delà, en ua Escòla Verda coma era Garona, aguesta accion a ua valor especiau: era naua zòna ajardinada damb arbes frutèrs non sonque hè eth pati mès naturau e mès viu, senon que tanben ac convertís en un recors educatiu entà apréner a suenhar era natura e a compréner eth miei que mos entornege”, a ahijut Alberto López.
Des der Ajuntament se soslinhe qu’aguesta intervencion hè part deth compromís municipau damb era milhora des espacis educatius e damb era creacion d’entorns escolars mès segurs, agradius e adaptadi as besonhs reaus dera comunitat educativa.
Era òbra permeterà qu’eth pati dera Escòla Garona dispòse de mès superfícia de jòc, milhores condicions d’emplec e un espaci exterior damb mès valor educativa, ambientau e sociau entàs mainatges e mainades deth centre.
Lieger mès
09/06/2026
Vielha e Mijaran apròve era 3au modificacion de credit deth pressupòst municipau per valor de 76.638,56€
Lieger mès
27/05/2026
Aguest dissabte, 23 de mai, se daurís era convocatòria de subvencions de Vielha e Mijaran de 2026
Lieger mès
22/05/2026
Deth 24 ath 31 de mai, Vielha e Mijaran acuelherà es actes dera Setmana dera Natura de Vielha e Mijaran
Lieger mès
