Ena vigilia dera Hèsta major de Betren eth president dera EMD de Betren Sr Francisco Faure a comunicat èster satisfèt pes dues importantes òbres que se realizen ena sua pedania, dempús d’acabada era plaça dera Calç en an 2.009.
Eth prumèr lòc s’amie a tèrme era urbanizacion deth Carrèr Major damb era canalizacion sosterranha d’aigua, lum, gas e telefòn ath long de tot eth carrèr.
Eth còst dera òbra ei de 265.000 èuros apuprètz e a estat possibla gràcies ara subvencion deth Departament de Governacion dera Generalitat e hons pròpris dera EMD de Betren.
Entar abastament d’aigua era presa se hè des dera captacion deth sistèma d’aigües de Vielha enquiath depòsit d’aigües de Betren.
Aguest abastament assegure totes es futures ampliacions d’aigües de Betren.
Eth dusau lòc ei era canalizacion sosterranha de lum, aigua, gas e telefòn cap a tot eth plan Parciau ath pè de pistes de Betren que hesse possibla era dubertura dera estacion.
Era inversion ei de 121.000 èuros apuprètz subvencionadi pera Agéncia Catalana dera Aigua e eth Departament de Politica Territoriau.
Tanben ditz èster conscient des molèsties entàs vesins originades per aguestes òbres e mes en aguesti dies de Hèstes, tot e que cree que çò mès important ei que damb er acabament d’aguestes òbres se compliràn uns objectius importants e d’ua grana melhora entara pedania e es vesins.