Notícies Veir istoric
Eth Plen der Ajuntament de Vielha e Mijaran apròve provisionaument per unanimitat des grops politics era adaptacion des Normes Subsidiàries e Complementàries de Planejament dera Val d’Aran, en airau der Espitau Val d’Aran
Damb era aprobacion des darrèri informes sectoriaus e allegacions se poirà amiar a tèrme era ampliacion e remodelacion der Espitau Val d’Aran frut der acòrd entre eth Conselh Generau d’Aran e eth departament de Salut dera Generalitat de Catal
Aguest maitin, eth plen der Ajuntament de Vielha e Mijaran a aprovat per unanimitat des grops politics municipaus era provisionalitat dera modificacion des Normes Subsidiàries e Complementàries de Planejament dera Val d’Aran, en airau der Espitau Val d’Aran. En aguest sens, s’an aprovat es informes sectoriaus e allegacions que se formulèren.
Damb aguesta aprobacion se seguís endeuant damb er expedient, en tot mantier es parametres establidi e vigenti ena aprobacion deth passat plen deth 29 de deseme de 2022. Ara aguesta modificacion se traslade ara Comission d’Urbanisme dera Val d’Aran, que ei qui aurà de hèr-ne era aprobacion definitiua.
Damb aguest darrèr pas se realizarà era ampliacion e remodelacion der Espitau Val d’Aran, en acòrd qu’eth Conselh Generau d’Aran artenhec damb eth departament de Salut dera Generalitat de Catalunya. En aguest sens, i aurà ua ampliacion der equipament en periòde 2023-2026, e ua remodelacion que serà prèsta en 2028. Dues actuacions de besonh, en çò que supause er espitau de referéncia dera gent dera Val d’Aran, era Alta Ribagorça, es Valls d’Àneu e era Ribagorça aragonesa.
D’aute biais, en plen tanben s’a aprovat era caducitat deth convèni de collaboracion interadministratiua damb era Gerencia de Infraestructura y Equipamiento de la Defensa (GIED). Aguest convèni tractaue sus era parcèla qu’eth Ministèri de Defensa a en parcatge des antigues casèrnes militares de Vielha. En tot aguest airau, eth consistòri dispause de 22.000 m², mentre que Defensa a 3023 m², des quaus, eth 10% des drets pertanhen ar Ajuntament de Vielha e Mijaran. Per tant, ère de besonh declarar era caducitat d’aguest convèni abantes de poder cercar naues formules, entre es quaus i è un possible nau convèni entre es administracions.
29/03/2023