Notícies Veir istoric
Er Ajuntament de Vielha e Mijaran milhorarà aguesta primauera eth marge esquèr deth passèig fluviau der arriu Garona ath sòn pas per Vielha e Betren
Damb era arribada deth bon temps s’inicien es òbres d’aguest projècte adjudicat en noveme de 2022 que permeterà era milhora deth passèig fluviau en tot crear un recorregut entà passejar e practicar espòrt, més segur, adaptat e enlumenat
A compdar d’aguesta primauera, er Ajuntament de Vielha e Mijaran iniciarà es trabalhs de milhora deth marge esquèr deth passèig fluviau der arriu Garona ath sòn pas per Vielha e Betren, concretament en tram comprenut entre eth carrèr Querimònia de Vielha e eth Pònt de Betren.
Era intervencion consistís ena retirada des trepadèrs jardinèrs que i a ath long deth camin en Vielha, que limite er espaci en males condicions, e ua auta part damb corsères estretes entre arbes entre eth parcatge e er arriu Garona. Aguesta prumèra part des òbres compren eth tram deth passèig fluviau entre eth carrèr Querimònia e era Avenguda deth Solan.
En tram de Betren i a ua part qu’ei limitat damb un mur d’hormigon e en d’auti endrets a format talhussi que se mingen ua part deth camin. Gran part des zònes de nautada ja dispausen d’ua parabanda de husta entà evitar queigudes.
Un viatge eliminadi es elements que dificulten eth pas des pedons, se procedirà a pavimentar-lo damb ua barreja engodronada de color nere damb ua amplada entre es 2 e 2,50 mètres damb eth menor desnivèu possible e se milhoraràn es elements de contencion deth camin damb escolhères de pèira de 800 a 1200 kilòs de pes e, enes zònes de mès nautada, se protegirà era possible queiguda damb parabandes de husta. En tram deth passèig de Betren se montaràn un seguit de balises cada 10 mètres entà enlumenar eth camin enquiath pònt de Betren, damb era avienta installacion electrica entà que se poguen connectar.
Eth projècte s’alongarà pendent diuèrses setmanes e compde damb un pressupòst totau de 296.277,95€.
Aguesta actuacion complète era milhora deth passèig fluviau qu’er Ajuntament de Vielha e Mijaran ja realizèc en 2019 en marge dret, en Eth Solan, damb era sua pavimentacion.
“Damb aguesta milhora deth marge esquèr deth passèig fluviau der arriu Garona, milhoram un tram qu’ei fòrça transitat per pedons, en tot balhar-li mès qualitat e enlumenar-lo entà que se pogue emplegar pendent tot eth dia”, comente eth baile de Vielha e Mijaran, Juan Antonio Serrano. E ahig que “ara auram tot eth passèig fluviau en bones condicions, dempús dera milhora que ja hèrem en 2019 deth camin en marge dret. D’aguesta manèra, milhoram era imatge d’aguest endret, a on fòrça gent passège e cor, e que servís de camin entà accedir a viuendes, installacions esportiues, centres escolars e espacis naturaus de Vielha e de Betren”.
22/03/2023