Notícies Veir istoric
Gran succès dera activitat “Espòrt Popular” en Vielha e Mijaran que de deluns a dijaus amasse a fòrça gent enes desparières modalitats esportiues que s’aufrissen
Pendent cada jornada, eth Palai d’Espòrts de Vielha acuelh entre 20 e 30 persones per session, en çò que supause auer era installacion municipau plia, en tot fomentar ua vida saludabla a trauès der espòrt
Un an mès, era activitat “Espòrt Popular” que s’amie a tèrme pendent es mesi que dure eth cors escolar en Palai d’Espòrts de Vielha, ei un succès enes desparières disciplines esportiues aufrides.
Cada setmana, de deluns a dijaus, en orari de 19:30 a 21:30, entre 20 e 30 persones vien abituaument entà practicar espòrt.
Eth programa ei eth següent: Deluns: fotbòl sala, dimars: tennis taula, bàsquet e badminton, dimèrcles: bòleibal, badminton e tennis taula, e dijaus: fotbòl sala. Era activitat se mantierà enquiath pròplèu mes de junh.
Er “Espòrt Popular” ei ua accion gratuïta impulsada per Ajuntament de Vielha e Mijaran en collaboracion damb eth Conselh Esportiu dera Val d’Aran, e qu’apòrte es valors qu’aufrís er espòrt, coma pòt èster era integracion sociau, pr’amor que gent de desparières nacionalitats practiquen espòrt amassa, atau coma era relacion intergeneracionau, a on joeni e gent mès grana compartissen ua estona d’espòrt sense qu’era edat sigue un andicap negatiu. Un exemple de dinamizacion, que pòrte des de 2017 en foncionament.
Aguesta activitat, amassa damb d’autes coma era Marcha Nordica, que tanben ei ua accion gratuïta impulsada per Ajuntament de Vielha e Mijaran, faciliten era practica der espòrt en un orari que permet era conciliacion familhau.
“Èm satisfèti dera grana acuelhuda que cada an a er ’Espòrt Popular’, a on cada setmana auem fòrça gent de tota era Val d’Aran practicant espòrt, en tot apropar es installacions esportiues municipaus ara gent, entà que les pogue gaudir”, comente eth dusau tinent d’alcalde e còsso d’espòrts de Vielha e Mijaran, Alberto López. E ahig que “er espòrt apòrte uns valors importanti entara societat coma ei eth companherisme, era relacion intergeneracionau e era integracion sociau de gent de desparièra procedéncia”.
23/03/2023