Notícies Veir istoric
Es dies 5 e 6 d’abriu se celèbre er 11au Tornèg Femenin de Fotbòl Sala de Vielha
Es inscripcions ja s’an daurit entad aguesta competicion que se disputarà en Palai d’Espòrts de Vielha pendent era Setmana Santa
Entà Setmana Santa arribe un des classics esportius des darrèri ans en Vielha e Mijaran: Eth Tornèg Femenin de Fotbòl Sala de Vielha qu’organize era AEFA (Associacion Esportiua Fotbòl Aran) amassa damb era Penha Barcelonista dera Val d’Aran. Enguan aguesta competicion arribe ara 11au edicion, en tot auer-se assolidat coma un referent esportiu en municipi.
Pendent es tardes des dies 5 e 6 d’abriu eth Palai d’Espòrts de Vielha torne a èster er escenari d’un tornèg que compde damb era collaboracion der Ajuntament de Vielha e Mijaran e es inscripcions ja son dubèrtes a toti es equips que siguen interessadi en participar-i.
Entà formalizar era inscripcion, es jogadores auràn d’aumplir era huelha d’inscripcion e liurar-la ara direccion de corrèu electronic: eraliga@gmail.com En cas d’èster jogadores de mens de 18 ans, auràn de liurar era autorizacion signada pes pairs/mairs.
Totes es jogadores receberàn un present, un diplòma damb era classificacion artenhuda, es tres melhors equips receberàn un trofèu, ath delà dera melhora jogadora e era maximala golejadora.
Eth sistèma de jòc se comentarà un viatge se coneishe era donada exacta d’equips que participen ena competicion e se facilitarà eth calendari de partits.
“Vielha e Mijaran assolide ua competicion esportiua que ja ei fixa en calendari annau en ua des installacions municipaus, coma ei eth Palai d’Espòrts. Un tornèig qu’amasse a fòrça jogadores dera Val d’Aran e que fòrça gent s’apròpe a gaudir en tot profitar es hèstes de Setmana Santa”, comente eth dusau tinent d’alcalde e còsso d’espòrts de Vielha e Mijaran, Alberto López.
27/03/2023