Notícies Veir istoric
Er Ajuntament de Vielha e Mijaran s’ahig ath Dia Mondiau dera Activitat Fisica damb era celebracion de jornades de pòrtes dubèrtes en Palai de Gèu der 11 ath 15 d’abriu
Pendent toti aguesti dies se poirà accedir de manèra gratuïta as desparièrs espacis dera installacion esportiua municipau, a exceptat dera pista de gèu
Pendent er 11 e eth 15 d’abriu, Vielha e Mijaran s’ahig ath Dia Mondiau dera Activitat Fisica (que se commemòre eth 6 d’abriu) damb era celebracion de jornades de pòrtes dubèrtes en Palai de Gèu de Vielha.
Er Ajuntament de Vielha e Mijaran, jos eth lèma “Gaudís dera vida, met-te en marcha!, vò encoratjar ara gent a que pogue amiar a tèrme un minim de 30 menutes d’espòrt ath dia.
En aguest sens, Vielha e Mijaran s’ahig, un an mès, ath calendari d’activitats que hèn part deth Plan d’Activitat Fisica Espòrt e Salut dera Generalitat de Catalunya a compdar de 2005, qu’a coma objectiu difóner es recomanacions d’activitat fisica entà auer ua bona salut e arténher qu’era poblacion sigue mès activa.
Er orari de dubertura dera installacion serà eth següent: dimars a diuendres des 9 as 13 ores e des 15 as 22 ores, e dissabte des 10 as 14 ores e des 16:30 as 20:30. En tot aguest espaci de temps, era gent poirà emplegar quinsevolh espaci esportiu deth Palai de Gèu, a exceptat dera pista de gèu.
“Des der Ajuntament de Vielha e Mijaran volem animar ara gent a practicar espòrt, e ac hèm en tot facilitar jornades de pòrtes dubèrtes ena principau installacion esportiua deth municipi e dera Val d’Aran coma ei eth Palai de Gèu”, comente eth dusau tinent d’alcalde e còsso d’espòrts, Alberto López. E ahig que “er espòrt ei de besonh entà poder mantier un estil de vida saludable”.