Notícies Veir istoric
Eth Plen der Ajuntament de Vielha e Mijaran impulse naues inversions enes pòbles, auance ena planificacion der accès ar abitatge e garantís era contunhitat des servicis municipaus
Er Ajuntament apròve ua modificacion de crèdit de 151.305,50 èuros entà seguir en tot melhorar es pòbles deth municipi, actualize es ordenances fiscaus damb un increment inferior ar IPC entà garantir era qualitat des servicis publics
Eth Plen der Ajuntament de Vielha e Mijaran, amassat aguest dimèrcles en session ordinària, a aprovat diuèrsi acòrds que refortilhen eth compromís deth consistòri damb era melhora des pòbles, era qualitat des servicis publics e era planificacion deth futur deth municipi des d’ua gestion economica responsabla.
Un des principaus acòrds a estat era aprobacion dera quatau modificacion de crèdit deth pressupòst municipau, per un impòrt de 151.305,50 èuros, finançada damb romanent de tresaureria.
Aguesta modificacion permeterà contunhar en tot collaborar damb es Entitats Municipaus Descentralizades entà executar naues accions de melhora enes pòbles deth municipi. En concrèt, er Ajuntament transferirà 111.581,02 èuros ara EMD de Vilac e Gausac, en tot destinar-ne 81.037,98 èuros entara urbanizacion deth carrèr Ilia de Vilac e 30.543,04 èuros tà accions de melhora dera seguretat viària e conservacion deth carrèr Portero de Gausac.
Atau madeish, er Ajuntament destinarà 39.724,48 èuros a melhorar era seguretat e era accessibilitat en entorn educatiu de Vielha mejançant era adeqüacion deth pas de pedons e des itineraris accessibles dera Avenguda Pas d’Arró e era Avenguda dera Tuca. Se tracte d’ua accion que refortilharà era seguretat d’un des espacis damb major transit de pedonhs deth municipi, utilizat jornalièraments per alumnes, familhes e vesins dera Escòla Garona e deth Institut d’Aran.
Damb er objectiu de seguir en tot impulsar inversions coma aguestes e mantier uns servicis publics de qualitat, eth Plen a aprovat tanben era actualizacion des ordenances fiscaus entad exercici 2027.
Era revision contemple, damb caractèr generau, un increment deth 2,5 %, inferior ath 3,2 % corresponent ar IPC actuau. Aguesta actualizacion permeterà adaptar progressivaments es ingrèssi municipaus ar increment des còsti de prestacion des servicis, en tot preservar era capacitat inversora der Ajuntament e en tot garantir era sostenibilitat economica de besonh entà seguir en tot melhorar er espaci public, es equipaments e es servicis municipaus.
Es modificacions afècten ar Impòst sus Bens Immòbles, que passe deth 0,70 ath 0,72 enes bens urbans e deth 0,72 ath 0,74 enes bens rustics, deth temps qu’eth tipe aplicable as bens immòbles de caracteristiques especiaus se manten en 1,30. Atau madeish, er Impòst sus Veïculs de Tracción Mecanica s’actualize deth 1,94 ath 1,99.
Eth Plen aprovèc egalaments er inici dera consulta publica prealabla sus ua possibla modificacion des Nòrmes Subsidiàries en contorn deth Plan Parciau PP1 de Betren, un sector urbanistic previst des de 1982 que contunhe pendent de desvolopament.
Damb aguest acòrd, er Ajuntament daurís un procès de participacion entà analisar s’eth modèl urbanistic en vigor contunhe d’arrespóner as besonhs actuaus deth municipi o se resulte avient impulsar ua naua organizacion que facilite er accès ar abitatge e permete planificar eth creishement de Vielha e Mijaran de forma mès adaptada ara realitat sociau e urbanistica actuau.
Era prepausa que motive aguesta consulta somet un modèl urban mès compacte e sostenible, damb abitatges de dimensions mès adaptades ara demanda actuau, un increment dera densitat residenciau e era resèrva deth 50 % dera edificabilitat residenciau entà abitatge damb quauque regim d’emparament public. Tanben prepause crear naui espacis verdi e equipaments, melhorar era integracion urbana dera carretèra C-28 e favorir ua mobilitat interiora damb major protagonisme entàs pedons.
Er Ajuntament considère qu’er accès ar abitatge constituís un des principaus rèptes de futur deth municipi e compren que quina decision que sigue sus eth desvolopament d’aguest contorn a d’adoptar-se damb era maximala transparéncia e participacion. Per açò, era consulta publica permeterà arremassar opinions e aportacions abans de decidir se procedís iniciar era modificacion deth planejament.
Aguest acòrd non supause era aprobacion de cap modificacion urbanistica ne autorize cap accion constructiva, senon que constituís eth prumèr pas deth procediment previst pera nòrma entà avalorar era oportunitat d’iniciar, en sòn cas, era tramitacion d’ua modificacion des Nòrmes Subsidiàries.
Eth baile de Vielha e Mijaran, Juan Antonio Serrano, a destacat qu’”es acòrds aprovadi aué arresponen a ua madeisha forma de compréner era gestion municipau: seguir en tot invertir enes nòsti pòbles, melhorar era seguretat e era accessibilitat, garantir uns servicis publics de qualitat e planificar eth futur de Vielha e Mijaran damb responsabilitat. Era collaboracion damb es Entitats Municipaus Descentralizades contunhe d’èster ua prioritat e, ath madeish temps, volem daurir un debat seren sus com a de créisher eth nòste municipi entà facilitar er accès ar abitatge, especiuaments entàs vesins e vesines que vòlen desvolopar ací eth sòn projècte de vida, en tot preservar ath madeish temps era identitat, era qualitat urbana e er equilibri que caracterizen en Vielha e Mijaran”.
Pendent era session tanben s’aprovèren per unanimitat es hèstes locaus entar an 2027. Eth Plen comencèc, ath delà, damb un messatge institucionau de solidaritat damb es victimes deth tèrratrem de Veneçuèla e damb totes es persones afectades pes incendis forestaus enregistradi pendent es darrèri dies en distintos punts dera peninsula e deth sud de França.
Lieger mès
29/07/2026
Vielha auance cap a un nau modèl de jardineria urbana damb era transformacion der entorn de Sant Miquèu
Lieger mès
24/07/2026
Vielha e Mijaran planifique era prevencion d’incendis entà protegir es pòbles e er entorn naturau
Lieger mès
