Notícies Veir istoric
Er Ajuntament de Vielha e Mijaran actue en lhet der arriu Garona entà facilitar eth pas dera aigua e redusir es obstacles deuant possibles creishudes
Es prètzhèts comprenen ua longitud totau de 2.957 mètres, en tot aucupar ua superfícia de 5.294,84 m² en zònes afectades per inondacions
Er Ajuntament de Vielha e Mijaran amie a tèrme trabalhs de milhora e manteniment en lhet der arriu Garona ath sòn pas per Vielha e Betren. Era accion a coma objectiu facilitar era circulacion dera aigua, redusir es obstacles existents en lhet e contribuïr a protegir es nuclèus urbans deuant possibles episòdis de creishuda deth Garona.
Es prètzhèts comprenen ua longitud totau de 2.957 mètres, en tot aucupar ua superfícia de 5.294,84 m² en zònes afectades per inondacions damb frequéncia de retorn T50, coma succedic en an 2013 a on er arriu se desbordèc en tot provocar damatges enes poblacions.
En entorn dera accion i a 6 pònts e ua passarèla entà pedonhs, es accions definides includissen era neteja des sediments plaçadi en dus d’eri, un doble a on enes sediments i a fòrça vegetacion, arbes e rominguères invasives e en un aute a on era pòca nautor jos eth pònt hè qu’es sediments acantieradiredusisquen era seccion de pas. Era rèsta de pònts se considèren nets e pro adaptadi as creishudes dera aigua.
Es trabalhs includissen era retirada de sediments acantieradi en punts concrèts deth lhet, especiuaments enes proximitats des pònts, atau coma accions selectives sus era vegetacion e es arbes.
Retirada selectiva d’arbes
En marc dera accion ei prevista era retirada selectiva de 10 arbes, en tot atier ath sòn estat e ara afectacion que pòden generar sus eth pas dera aigua:
- 2 arbes mòrti plaçadi laguens deth lhet.
- 4 arbes deterioradi o damb risc de queiguda.
- 4 arbes plaçadi sus acumulacions de sediments ath cant d’un pònt, que pòden contribuïr a redusir era seccion de pas e favorir era retenguda de rèstes pendent episòdis de creishuda.
Era intervencion se realizarà de manèra selectiva, en tot priorizar era seguretat, era conservacion der entorn e era milhora dera capacitat idraulica deth cauce.
Contròtle d’espècies vegetaus invasores
Es trabalhs tanben contemplen eth contròtle des espècies vegetaus invasores presentes enes marges der arriu. Era accion se centrarà especiuaments ena buddleja, ua espècia que pòt espandir-se rapidaments e aucupar espacis de ribèra, en tot desplaçar ara vegetacion autoctòna.
Entà arturar-ne era sua expansion, se procedirà ara retirada des plantes e ara extraccion des sues arraïtzes, damb er objectiu de redusir ath maximal era possibilitat de naui brotons. Dempús dera accion iniciau se realizarà un seguiment especific des zònes tractades entà detectar e eliminar es naues plantes que poguen aparéisher.
Aguest contròtle contunhat ei de besonh pr’amor qu’era retirada dera part aeriana dera planta non evite tostemp era sua regeneracion. Per aguest motiu, eth projècte incorpòra mesures de manteniment e vigilància posteriora as trabalhs iniciaus.
Dus ans de mantenença e seguiment
Era accion includís dus ans de manteniment dera vegetacion, que se controtlaràn pendent en brotons e se harà un seguiment des zònes tractades.
Aguest periòde permeterà verificar era eficacitat des trabalhs, actuar sus es naui brotons de buddleja e evitar qu’es espècies invasores tornen a aucupar es airaus intervengudi. D’aguesta manèra, er Ajuntament cerque garantir qu’era milhora deth lhet age contunhitat e non se limite a ua accion puntuau.
Ua accion entà melhorar eth pas dera aigua
Era retirada de sediments, eth contròtle dera vegetacion invasora e era accion selectiva sus es arbes permeteràn redusir es elements que pòden obstaculizar eth fluxe dera aigua, especiuaments enes punts mès sensibles deth lhet e en entorn des pònts.
Er objectiu ei milhorar es condicions de desaigüe der arriu Garona e contribuïr a amendrir es risqui associadi ara acumulacion de vegetacion, arbes e sediments pendent episòdis de ploges intenses e creishudes.
Eth pressupòst totau dera accion, qu’includís autant es trabalhs iniciaus coma eth manteniment posterior pendent dus ans, puge a 48.194,45 èuros.
“Damb aguesta accion volem milhorar er estat deth lhet dera Garona, facilitar eth pas dera aigua e redusir es obstacles que pòden agravar es efèctes d’ua creishuda. Era retirada selectiva des arbes, eth contròtle dera buddleja e eth seguiment posterior son mesures de besonh entà protegir nòsti pòbles e mantier er arriu en millhores condicions”, soslinhe eth baile de Vielha e Mijaran, Juan Antonio Serrano.


16/11/2026