Notícies Veir istoric
Eth Palai de Gèu de Vielha organize aguest ostiu ua estada de patinatge artistic sus gèu
Era activitat se desvoloparà deth 3 de junhsèga ath 25 d’agost, en tot auer-i entrenaments de deluns a diuendres en orari de maitin, des 8 as 15 ores
Aguest ostiu, eth Palai de Gèu de Vielha organize ua estada de patinatge artistic sus gèu, qu’aurà lòc deth 3 de junhsèga ath 25 d’agost.
Aguesta activitat ei dirigida a toti aqueri patinadors qu’agen un minim de nocions de patinatge, en tot auer-i diuèrsi nivèus: iniciau, perfeccionament e tecnificacion. Ei dubèrt a patinadors locaus, atau coma arribadi de diuèrsi endrets d’Espanha e de França. Era edat des participaires ei a compdar des 6 ans enquia adults.
Es oraris d’entrenament seràn programadi de deluns a diuendres, des 8 as 15 ores. Cada dia, es patinadors des nivèus iniciau e perfeccionament auràn dues sessions de trabalh en gèu e ua de fisic, mentre qu’es patinadors de tecnificacion auràn tres sessions de gèu e ua de fisic.
Aguesti corsi permeteràn qu’es patinadors, amassa damb era entrenadora Nathalie Pardos, poguen trabalhar damb es reglaments oficiaus, pr’amor que cada an es estaments internacionaus cambien era reglamentacion annau e, d’aguesta manèra, se pòt premanir e començar a trabalhar en nau cors esportiu. En aguest sens, ei previst que se pogue compdar damb quauque jutge oficiau entà qu’aufrisque ua charrada sus era naua reglamentacion.
Entà mès informacion e/o formalizar es inscripcions, vos podetz adreçar ara recepcion deth Palai de Gèu de Vielha. Atau madeish, podetz trucar ath telefòn 973642864 o enviar un corrèu electronic ara adreça: palaidegeu@vielha-mijaran.org
03/05/2023