Notícies Veir istoric
Aguesta dimenjada se dispute era 13au edicion deth Tornèg 30 Ores de Fotbòl Sala Vila de Vielha
Equips dera Val d’Aran, Lhèida, Barcelona, Tarragona e Girona participaràn en aguest campionat que se celebrarà en Palai d’Espòrts de Vielha
Eth Palai d’Espòrts de Vielha acuelherà pendent es dies 17 e 18 de junh, ua naua edicion deth Tornèg 30 Ores de Fotbòl Sala Vila de Vielha. Enguan aguest campionat artenh era 13au edicion, en tot consolidar-se coma un eveniment fixe en calendari esportiu de Vielha e Mijaran ena primauera.
Dempús de 3 ans arturada era competicion a conseqüéncia dera pandémia dera COVID-19, aguest campionat torne a scèna.
Enguan i aurà un totau de 16 equips, en tot auer-ne dera Val d’Aran e de diuèrsi endrets de Catalonha. Dera Val d’Aran i aurà 7 equips: Valcester, Es Banhs-Casa Luis, Purica, FC Fogoneros, Gahusbarber, Kowalski e Q-Mont. De dehòra: Future Stars (El Pont de Suert), Futsal Lleida (Lhèida), Tiki Taka (Santa Coloma de Farners), FS QTM RQJ (Vilanova i la Geltrú), DMS SQUAD (Barcelona), MAQ OCASIÓN (Lhèida), FREE PALESTINA (Tarragona), TU EQUIPO FAVORITO (Vilanova) e SUPERMOTOR FC (Tarragona).
En çò que tanh as prèmis, es guanhadors s’emportàran 2250€ e es finalistes, 850€. Tanben i aurà prèmis entath Màger Golejador, Melhor Portèr e Jogador Mès Avalorat e Fair Play.
Segontes eth baile de Vielha e Mijaran, Juan Antonio Serrano, “èm fòrça erosi de poder collaborar en un campionat com aguest que ja ei un fixe en calendari esportiu, a on se met en valor er espòrt en Vielha e Mijaran e, sustot, que favorís que esportistes de dehòra poguen vier cada an entath nòste municipi e gaudir d’ua dimenjada damb es nòsti joeni en un gran ambient en Palai d’Espòrts de Vielha”.
16/06/2023