Notícies Veir istoric
Er Ajuntament de Vielha e Mijaran refortilhe era relacion damb es Entitats Municipaus Descentralizades, en tot mantier ua estreta collaboracion e balhant-les mès autonomia
Ena prumèra amassada dera naua legislatura entre er equip de govèrn municipau e es presidents des EMD, s’a acordat er increment dera aportacion der Ajuntament de Vielha e Mijaran as EMD de cara ath pressupòst municipau de 2024
Aguesta setmana a auut lòc era prumèra amassada d’aguesta naua legislatura entre er equip de govèrn municipau e es presidents e vocaus des Entitats Municipaus Descentralizades de Vielha e Mijaran, en tot començar a tractar es ahèrs importanti entà auer ua estreta collaboracion de cara as pròplèu quate ans. Ues amassades que se realizaràn de manèra periodica (cada 3 mesi).
Er objectiu d’aguestes amassades ei mantier era estreta relacion entre er Ajuntament de Vielha e Mijaran e es EMD, en tot trabalhar entà poder conéisher quini son es besonhs des diuèrsi pòbles, establir ua connexion entre es naui membres des diuèrses institucions e començar a elaborar ua huelha de rota de trabalh a seguir.
Er equip de govèrn de Vielha e Mijaran manten era voluntat de trabalhar conjuntament damb es EMD, coma a estat abituau enquiara, e preten balhar-les supòrt e mès autonomia entà que poguen auer libertat entà decidir coma gestionar es sòns pròpris servicis e recorsi. En aguest sens, s’a acordat un aument des aportacions economiques qu’er Ajuntament de Vielha e Mijaran aufrirà as EMD en pressupòst municipau de 2024. D’aguesta manèra poiràn decidir coma gestionar, sustot, es airaus dera neteja e era jardineria.
“Era voluntat fèrma der Ajuntament de Vielha e Mijaran ei era de contunhar balhant supòrt as EMD en tot çò qu’agen de besonh. Seguiram finançant part des grani projèctes que poguen méter en foncionament, mès tanben volem qu’agen mès autonomia, entà que poguen auer mès capacitat de decision entà gestionar es sòns servicis e recorsi. Açò ja serà efectiu a compdar de 2024 damb un aument dera aportacion economica per part der consistòri”, comente eth baile der Ajuntament de Vielha e Mijaran, Juan Antonio Serrano. E ahig que “damb aguestes amassades periodiques auem un contacte dirècte damb es EMD, en tot generar ua sinergia estreta entre er equip de govèrn municipau e es representants des pòbles, que volem que sigue constant ena legislatura”.
Per part der equip de govèrn municipau i sigueren presenti eth baile de Vielha e Mijaran, Juan Antonio Serrano, eth còsso d’òbres e servicis, Jacint Cuny, era còsso de pedanies, Vanessa Fandiño e eth còsso d’administracion publica, hisenda e economia, Alberto López. Atau madeish, i sigueren presenti es presidents e vocaus des desparières EMD.
Un des grani projèctes que s’amiaràn a tèrme per part der Ajuntament de Vielha e Mijaran pendent es pròplèu dus ans e, deth quau se’n veiràn beneficiadi toti es pòbles deth municipi, ei eth cambi der enlumenat public laguens deth projècte Next Generation, avalorat en mès d’1 milion d’èuros. Se cambiaràn 2.494 punts de lum existents per uns de tecnologia LED e 45 quadres electrics. Un projècte artenhut per Ajuntament de Vielha e Mijaran entà poder milhorar es condicions luminiques de tot eth municipi.
Atau madeish, des deth consistòri se manten eth compromís de seguir trabalhant ena milhora e manteniment deth hilat d’aigües e des depòsits d’aigua de toti es pòbles, atau coma ajudar economicament en finançament des grani projèctes qu’es EMD agen pendent es pròplèu ans.
19/07/2023