Notícies Veir istoric
Eth plen der Ajuntament de Vielha e Mijaran apròve era 3au modificacion de credit deth pressupòst municipau, damb era que se poderà amiar a tèrme era reurbanizacion dera Plaça Còto Março de Vielha
Ath delà, eth plen a aprovat era unificacion des Normes Subsidiàries entara installacion de captadors solars, qu’ara se lheuarà ara Comission d’Urbanisme dera Val d’Aran entara sua aprobacion definitiua
Aguest maitin, eth plen der Ajuntament de Vielha e Mijaran, amassat en session ordinària, a aprovat era 3au modificacion de credit deth pressupòst municipau de 2023, avalorada en 599.260,20€, damb es vòts a favor deth govèrn d’Unitat d’Aran, era abstencion de Convergéncia Aranesa e eth vòt en contra d’Aran-Amassa.
Damb aguesta aprobacion, se poderà executar eth projècte de reurbanizacion dera Plaça Còto Março de Vielha. Un projècte qu’ei avalorat en 362.950,86€.
“En aguesta parçan ampliam eth casc urban de Vielha, en tot crear naui espacis entara ciutadania. Ua milhora importanta d’aguest airau que beneficiarà era circulacion de veïculs e permeterà crear naues places de parcatge en centre deth pòble”, comente eth baile de Vielha e Mijaran, Juan Antonio Serrano.
D’aute biais, tanben s’a aprovat era unificacion des Normes Subsidiàries en relacion as captadors solars (pannèus solars). Era prepausa iniciau der Ajuntament de Vielha e Mijaran s’envièc ath Conselh Generau d’Aran, que hec diuèrses modificacions, e damb aguesta darrèra aprobacion, eth projècte se lhèue ara Comission d’Urbanisme dera Val d’Aran, qui n’harà era aprobacion definitiua entà que pogue entrar en vigor.
Atau madeish, eth plen tanben a aprovat era prepausa des hèstes locaus deth municipi de 2024. Era relacion de dies hestius son: Vielha (22 de mai e 8 d’octobre), Arròs (29 d’agost e 8 d’octobre), Aubèrt (7 d’octobre e 11 de noveme), Betlan (5 d’agost e 8 d’octobre), Betren (5 e 8 d’octobre), Casarilh (8 d’octobre e 21 de deseme), Casau (25 de junhsèga e 30 de noveme), Escunhau (29 de junh e 8 d’octobre), Gausac (16 d’agost e 8 d’octobre), Mont (10 d’agost e 8 d’octobre), Montcorbau (3 d’agost e 8 d’octobre), Vila (16 d’agost e 8 d’octobre) e Vilac (1 d’agost e 8 d’octobre).