Notícies Veir istoric
Er Ajuntament de Vielha e Mijaran reurbanizarà era Plaça Còto Março de Vielha
Damb un pressupòst totau de 362.950,86€ eth projècte contemple adaptar era plaça mantien un espaci de parcatge e en tot balhar mès protagonisme as pedons damb era installacion de mobiliari urban e naua vegetacion
Er Ajuntament de Vielha e Mijaran amiarà a tèrme enes pròplèu mesi eth projècte de reurbanizacion dera Plaça Còto Março de Vielha. Un espaci compausat de 1405 m², a on se realizarà era adaptacion dera plaça limitant er espaci reservat entath parcatge de veïculs e ua auta part mès ampla entà que poguen transitar es pedons, en tot fomentar ua milhora dera urbanizacion d’aguest parçan deth Casc Antic.
Per tant, damb aguest projècte, se balharà protagonisme as pedons, en ua intervencion que se compren coma ua prepausa globau que vò omogeneïzar era plaça e eth sòn entorn entà méter en valor es elements caracteristics existenti (era Glèisa Sant Miquèu, es façades e era vegetacion) e connectar-se damb eth centre istoric.
Ena plaça i aurà un paviment caracteristic que ligarà es desparières zònes e accèssi, en tot favorir es circulacions intèrnes en quinsevolha direccion e sentits possibles entre es carrèrs que i arriben. Atau madeish, i aurà un seguit de mobiliari urban qu’ajudarà a acotar er espaci reservat ath transit. En aguest sens, i aurà un banc corregut e de descans centrau longitudinau dividit en quate pèces, plaçades de forma que permeterà eth pas centrau des pedons e evitarà eth pas des veïculs. Atau madeish i aurà tres paperères entà mantier un corrècte emplec dera plaça, e ua hònt que se traparà en centre, coma element que favorirà qu’era Plaça Còto Março sigue un espaci agradiu e que pogue potenciar que s’i amassen es vesins e visitaires. Fin finau, i aurà vegetacion que permeterà que i age zònes d’estada e damb ombra. Se mantieràn es tres arbes existenti e se n’i plantaràn dotze mès.
Era prepausa contemple ua estratégia urbana e arquitectonica que permet resòlver era plaça en sòn conjunt e damb era possibilitat d’estener-la tanben enquiara Avenguda Pas d’Arró e que permeterie compréner era Plaça Còto Março e era Plaça dera Glèisa coma un solet conjunt. En aguest sens, eth plan dera plaça se trobarà damb era façada laterau dera Glèisa de Sant Miquèu. Damb escales, era glèisa presentarà un aspècte elevat en relacion ara plaça, qu’ath delà, permeterà qu’er aigua dera ploja o era nhèu impacten damb era façada, e atau, impedir eth sòn deteriorament.
Es òbres començaràn se licitaràn enes pròplèu mesi, e compden damb un pressupòst totau de 362.950,86€.
“Damb aguesta intervencion ena Plaça Còto Março de Vielha milhoram aguest endret unificant aguest espaci damb era Plaça dera Glèisa, en tot crear zònes a on es pedons seràn es veritables protagonistes. Ua milhora importanta, balhant mès berèsa e unificant aguest parçan deth Casc Antic de Vielha, un fèrm compromís der equip de govèrn entà dotar ara ciutat de lòcs damb fòrça mès vida sociau e economica”, comente eth baile de Vielha e Mijaran, Juan Antonio Serrano.
17/08/2023