Notícies Veir istoric
Vielha e Mijaran subvencionarà eth 50% deth còst deth materiau escolar des alumnes dera Escòla Garona entath cors escolar 2023/24
Mès de 400 alumnes se’n beneficiaràn d’aguesta ajuda qu’aufrís eth consistòri, en un convèni signat damb eth centre escolar, damb eth que se destinaràn 20.000€ entà ajudar as familhes
Er Ajuntament de Vielha e Mijaran sufrague eth 50% des despenes deth materiau escolar des alumnes dera Escòla Garona de Vielha, entath cors escolar 2023-24.
Eth consistòri destine ua partida de 20.000€, gràcies ath quau mès de 400 alumnes se’n beneficiaràn d’aguesta subvencion, que se destine a ajudar as familhes en uns momenti economics fòrça complicadi. En totau, lèu se destinarà 50 € d’ajuda per cada alumne empadronat en municipi, d’un totau de 90€ de còst deth materiau escolar.
En 2020 eth consistòri ja destinèc ua ajuda extraordinària entà sufragar eth 50% deth còst d’aguest materiau escolar, e enes darrèri ans ja s’aufric aguesta ajuda entà materiau en forma de convèni, de manèra que se refortilhe eth compromís d’ajudar economicament as familhes pendent eth nau cors escolar.
“Damb aguest convèni, des der Ajuntament de Vielha e Mijaran seguim en tot ajudar as familhes deth municipi ena crompa de materiau escolar”, comente eth baile de Vielha e Mijaran, Juan Antonio Serrano. E ahig que “refortilham eth nòste compromís damb es familhes d’ajudar-les en un moment economicament complicat. En 2020 ja aufrírem ua ajuda extraordinària en airau escolar, e enguan la mantiem en forma de convèni, coma ja hèrem enes darrèri ans, entà assegurar qu’es alumnes poguen dispausar deth materiau escolar de besonh”.
21/08/2023