Notícies Veir istoric
Vielha e Mijaran tornarà a èster er epicentre deth mototorisme aguesta pròplèu dimenjada damb era 12au edicion dera Rodibook
Es dies 1 e 2 de seteme, 1500 motoristes preneràn part d’aguest eveniment qu’a a Vielha coma lòc de gessuda e d’arribada, en tot trauessar bona part deth Pirenèu aragonés, francés, andorran e catalan
Vielha tornarà a èster epicentre deth mototorisme aguesta dimenjada, en tot acuélher es dies 1 e 2 de seteme era 12au edicion dera Rodibook, era pròva non competitiva de motociclisme que se celèbre en Pirenèu.
Vielha ei, coma cada an, eth lòc de gessuda e arribada d’aguest eveniment, qu’enguan artenh era chifra rècord de 1500 participaires, en tot supausar ua repercusion economica entath conjunt deth sector toristic de Vielha e Mijaran de mès de 300.000€. Ua pròva qu’a lòc pera Val d’Aran, Aragon e sud de França en tot completar mès de 700 kms enes desparières modalitats premanides.
Era Rodibook ja ei un clàssic des eveniments der ostiu en Vielha e Mijaran, qu’amasse a participaires arribadi de diuèrsi parçans d’Espanha, atau coma d’auti païsi d’Euròpa.
Eth parcatge des antigues casèrnes militares ei er epicentre d’aguest eveniment, en tot acuélher era gessuda e era arribada, atau coma era carpa a on se desvoloparà eth sopar des participaires era net deth 2 de seteme. Atau madeish, enguan s’a duplicat era preséncia d’expositors damb es marques oficiaus de motocicletes.
“Un an mès, Vielha e Mijaran torne a plaçar-se coma er epicentre deth mototorisme en Pirenèu damb era celebracion dera Rodibook. Un eveniment que ja ei un clàssic en calendari d’eveniments en nòste municipi, en tot mercar lèu era fin d’un ostiu fòrça important entà Vielha e Mijaran a nivèu esportiu”, comente eth baile de Vielha e Mijaran, Juan Antonio Serrano.
30/08/2023