Notícies Veir istoric
Se reactiven es òbres ena Carretèra de Gausac damb era substitucion dera canerada de fibrociment existenta per ua naua de polietilen
Aguesta actuacion supause era installacion d’un tuèu de 230 ml damb un pressupòst totau de 37.418,36€, en ua accion executada per Ajuntament de Vielha e Mijaran
Pendent aguest mes d’agost s’an reactivat es òbres deth projècte de milhora dera pavimentacion dera Carretèra de Gausac, que ja s’inicièc en 2022. En aguest sens, aguesta darrèra fasa deth projècte consistís ena subtitucion dera canerada de fibrociment existenta, que hè fòrça ans qu’ère installada e que demore obsoleta, per ua naua de polietilen, que milhorarà era qualitat der aigua e, conseqüentament, era salut des vesins e visitaires de Gausac.
Damb aguesta naua intervencion se place un nau tuèu de 230 ml, que compde damb un pressupòst totau de 37.418,36€. Aguesta darrèra actuacion ei eth motiu peth quau eth projècte encara demoraue sense finalizar.
Eth fibrociment ei un element que ja demore obsolet e que s’a d’anar substituïnt, pr’amor qu’er amiant que i a compòrte grèus risqui entara salut dera gent, e s’a d’eliminar abans de 2028, per mandat dera Union Europèa.
Eth projècte ei executat pera Entitat Descentralizada de Gausac, damb un pressupòst iniciau de 368.248,41€, que compde damb un finançament de 180.000€ per part der Ajuntament de Vielha e Mijaran, e ua petita aportacion deth Plan d’Inversions Locaus, qu’ara s’a vist incrementat pera naua partida destinada as canerades.
“Damb aguesta intervencion, finalizarà aguest projècte de milhora dera entrada deth pòble de Gausac iniciat en 2022, en tot milhorar era qualitat des canerades der aigua, qu’ath viatge, supausarà ua milhora dera salut e benéster des vesins e visitaires deth pòble”, comente eth baile de Vielha e Mijaran, Juan Antonio Serrano. E ahig que “pòc a pòc eliminam er amiant des canerades deth municipi, en tot plaçar-i polietilen, complint damb eth mandat dera Union Europèa de hè’c abans de 2028”, e ahig que “damb aguesta darrèra intervencion era aportacion economica der Ajuntament de Vielha e Mijaran en pòble de Gausac arribe as 217.418,36€”.
Se demore qu’aguesta actuacion sigue prèsta enes pròplèu dies, en tot finalizar era sason d’ostiu.
31/08/2023